Champion lai Magpies hmaah Spurs

Zanin dar 1:30 hian League Cup champion lai Newcastle United-in Tottenham Hotspur an mikhual dawn. Magpies hian season bul an ṭan ṭha tawk lo a, Spurs an che ṭha zawk. Thomas Frank-a hote hian Goodison Park-ah Everton 3-0 a an sawp zawh chiah avangin St James Park-ah pawh chak tura inrintawkna an ngah khawp ang.

Eddie Howe-a kaihhruai Newcastle hian league-ah an chet ṭhat loh avangin League Cup hi an la thutak lehzual dawn. Kar tawp khan Fulham 2-1 in an hneh a, Jacob Murphy leh Bruno Guimaraes ten an khung. Nick Woltemade goal khung loh ṭumah pawh goal khung tur an awm tiin a sawi theih.

German striker Woltemade hian tun season inelna hrang hrangah goal nga khung tawhin tlarhmaah hmun pawimawh a chang a, Anthony Gordon nen an inkawp rem avangin Spurs tlarhnung tan pawh ven uluk a ṭul dawn. Magpies hian tun season-ah Champions League an khel a, Premier League-a pawimawh bawk si avangin Eddie Howe-a tan pawh squad siksawi thiam a ṭul ang.

Chutihrualin Magpies hian hliam vangin Lewis Hall, Tino Livramento leh Yoane Wissa te an chhawr thei dawn lo a, defender Sven Botman dinhmun a chiang lo bawk. Spurs lam pawhin hliam an ngah a; khel thei lo leh dinhmun chiang lo zingah James Maddison, Dejan Kulusevski, Cristian Romero leh Destiny Udogie te an tel.

Mahse, Thomas Frank-a hote hi set piece-ah an ṭha a, defender Micky van de Ven chu goal venghimtu chauh ni loin, goal khung kawngah pawh hmuh pawimawh chang thei dawn. Tun hnaiah khualmualah an record a ṭha a, St James Park-ah erawh an record a ṭha lo thung.

Newcastle hian Spurs hi an mikhual hnuhnung pathumah an hneh vek a, Thomas Frank-a hnuaiah London club hian an record ṭha lo tak hi siam ṭhat an tum dawn a ni.