Sub Jr Football-ah goal inkhungsiak ni

Sub Junior Boys National Football Championship-ah Mizoram leh Manipur ten an match hmasa berah an khingpuite an sawp ve ve a, vawiinah state inkhelh thiam pahnih hian goal an inkhungsiak dawn. Inkhel hi YouTube channel SportsKPI-ah a en theih ang.

Mizoram hian vawiin chawhma dar 9:00-ah Bihar an hmachhawn ang a, tlai dar 3:00-ah Odisha leh Manipur an inkhel ang. Inelna hi Amritsar-ah neih a ni a, Manipur hian Bihar hi 10-0 in an sawp thei a; chutihrualin Mizoramin Odisha hi 13-0 in an sawp thung.

Mizoram hi tier 1-ah an awm a, tier 1-ah hian team 16 awmin group paliah ṭhendarh an ni a, a sang ber ṭheuhin semifinal an lut dawn. Group khat aṭanga pakhat chauhin knockout stage an luh dawn avangin goal difference pawh hi a pawimawh hle.

Kum bithliah inelna ni mah se group A-ah Mizoram leh Odisha te an te fal deuh a, Manipur leh Bihar te an phanchang deuh. Bihar hi an len ṭhat avangin Manipur-in 10-0 in sawp mah se Mizoram tan goal tam tak khung hi thil awlsam a ni kher lo ang.

Mizoram coach K. Lalrindika chuan, "Kan nauten inrintawkna an ngah a, an phur khawp mai. Eng team pawh hmachhawn ila, Mizoram tan theihtawp kan chhuah zel ang," tiin Vanglaini a hrilh. Dika kaihhruai team hian Manipur aiin goal thum la khung tam mah se match tawp bera dinhmun ṭha zawka ding turin vawiina goal khung tam hi a pawimawh takzet a ni.