Sainunmawia & Zoramthari te hlawhtling

Badminton-ah Mizoram hming a mawi zel - Sainunmawia Sailo leh Zoramthari Renthlei te chuan All India Junior Ranking Badminton Tournament 2025-ah Mizoram tan bronze medal an hlap chhuak.

Madurai, Tamil Nadu-a neih inelnaah hian Mizo shuttler pahnih hi mixed doubles category-ah an inlan a, Thartei hian Mizoram record a siam nghal bawk - Mizo zinga national level badminton inelnaa, Junior (Under-19) category-a lawmman la thei naupang ber a ni.

October 22-29 chhunga neih inelnaa inlan Thartei hi kum 15 leh thla nga mi lek niin, kum 16 mi ni chunga he record lo siam tawhtu H. Lalṭhazuala chu a rawn khum ta a ni.

Ramhlun Venglai rawlthar Sainunmawia leh Champhai Vengthlang naupang Thartei te hian round hmasa berah player ṭha Aksh Singh leh Ananya A. te an tum a, 6-21, 22-20, 21-19 in an hneh hram.

Round of 16-ah tournament a seeded no 4, Karamat Ul Haq Mohammed leh Deepika Devanaboina-te ṭang dun chu 21-16, 21-9 in an paltlang a, quarterfinal-ah seeded no 7 Divyansh Agrawal leh Skledeep Kour-te inkawp chu 21-18, 21-18 in an hneh leh a, semifinal an lut.

Mahse, semifinal-ah erawh Harish Ragavendiran V. leh Rubika Kumaran te ṭang dun chu 11-21, 22-20, 17-21 in an hneh ta lo a ni.

He inelnaah hian Sainunmawia hi Malsawmhlua nen ṭang dunin, boy's doubles-ah an inlan a, mahse, round of 16-ah an tawp. Hetihlai hian H. Lalrinhlui pawh mixed doubles-ah inlanin, a partner nen round of 16-ah an tawp bawk.

Mizo shuttler inlante hi Tata Trusts, NEIDA, PGBA leh MBA-te thawhhona hnuaia badminton zir ho niin, Pullela Gopichand Badminton Academy (PGBA), Hyderabad-a inzir mek an ni.

Mizoram Badminton Association (MBA) chuan thuchhuah siamin, Mizoram tihmingṭha a, medal lak belh thei an awm zel chu lawmawm an tih thu an sawi a, "Player-te kan chhuang takzet a ni," an ti bawk.