Fulham an chak hram

Premier League club Fulham an mualpho teuh hle - London club hian League Cup-ah quarterfinal an inpetkai a, mahse, League One club Wycombe Wanderers laka hnehna chang turin vanneihna an mamawh thung!

Wycombe hian minute lina lekah Fulham hi barakhaihin, mualneitu team tan hian Cauley Woodrow chuan goal hmahruai a khung - kum 30 mi forward hian 2011-2019 inkar khan Fulham tan a lo khel tawh ṭhin a, a club hlui lakah goal a khung.

Goal an chhuah hnuah Fulham khel ṭha sawt mah se, a pawimawh ber goal khung tur erawhin second half an nghah thlen a ngai a, minute 48-naah Josh King chuan mikhual team tan si phurh a sut.

Second half-ah pawh Fulham hian inkhel thunun mah se, Wycombe goalkeeper Will Norris tibuai khawpa chance hlauhawm erawh sawi tur an nei bik lo a, 1-1 a inkhel tawpin penalty hmanga chak zawk zawn a ni.

Player pasarih ve vein an pet hnuah, 5-4 in Fulham an chak a, League Cup quarterfinal an lut. Fulham boss Marco Silva chuan, "A tira rilru kan pek tawk loh chuan, he inelnaah hian beisei loh result a thleng thei tih chu a hretu kan ni.

"Kan serious lo ka ti lo a, mahse, tun hnaiah result kan neih ṭhat loh avangin inrintawkna kan nei lo a, hlauhthawnnain kan khat a, chu chu kan inkhel ṭantir lamah khan a lang a ni," a ti.

Fulham hi an league match hnuhnung paliah an tlawm vek! Silva chuan, "Wycombe khan shot an neih chhunah goal an rawn khung a, veng thei tur kan ni bawk. Bul kan ṭan ṭhat tur angin kan ṭan ṭha lo a, a hnuah erawh kan insiamṭha.

"Hetiang hun harsa tawh lai hian a êng zawnga thil thlir tlat tur tiin player-te ka hrilh. Hliam vangin kan buai tel a, an lo kir hunah kan zia leh sawt ang. A pawimawh ber erawh huaisen taka kan beih ho zel a ni," a ti a, a naute a fuih nghal.