Thunder chakna Gilgeous-Alexander

Shai Gilgeous-Alexander-a point 31 neih hmangin Oklahoma City Thunder chuan Sacramento Kings chu 107-101 in an hneh - NBA regular season kal laiah Thunder hi an la chak kim vek a ni.

Paycom Center, Oklahoma-a inkhelah Thunder hi an khel ṭha tlang a, season hmasa Most Valuable Player Gilgeous-Alexander chu mimala langsar leh team chakna hnar a ni leh ta chiah bawk.

Season kal laia point 143 nei tawh Gilgeous-Alexander chuan, "Hnehna chang turin thapui ka thawh a, a rah kan seng bawk," a ti. Quarter hnuhnung ber tir lamah Thunder hi point thumin an hniam zawk, a tawpah erawh an chungnung leh ta tho a ni.

Thunder hian an match lehpekah chuan Washington Wizards an tum dawn a, hetih lai hian Kings chu Chicago Bulls khel turin an zin chhuak thung ang.

Giannis Antetokounmpo pawh Milwaukee Bucks tan a la rintlak reng, a team hi New York Knicks lakah point 14 laiin hnufual hman mah se inkhel a zawh meuh chuan Bucks hian 121-111 in hnehna an chang - Antetokounmpo chuan point 37 a nei a, heng zinga 23 lai chu second half china a neih a ni.

Inkhel dangah Philadelphia 76ers chuan 139-134 in Washington Wizards an hneh a, hneh loh nei loa an kaltluang lai chu an chhawm nung. Golden State Warriors pawhin Los Angeles Clippers 98-79 in an hneh a, Miami Heat chuan Charlotte Hornets lakah 144-117 in hnehna an chang ve bawk.