Laipui a puak leh tawh!

Tunlai chu Arsenal dang thei an awm meuh lo - League Cup round of 16 draw neih a nih khan Gunners fan-ten team nem zawk tum lo a, Brighton & Hove Albion an hmachhawn tur chu pawi an ti.

Mahse, a tak ramah erawh Brighton tan Arsenal an 'u' hret a, Gunners khelmualah 2-0 in an tlawm. Arsenal boss Mikel Arteta-a'n League Cup aiin Premier League a ngai pawimawh zawk a, kar liam taa Crystal Palace hnehtu team aṭangin player 10 ngawt a siksawi.

Kum 15 mi Max Dowman chuan inkhel bul ṭanin, Arsenal tana inkhel bul ṭan thei naupang ber a ni a, kum 17 mi Andre Harriman-Annous pawhin Gunners tan bul a ṭan - heti chung hian Brighton tan chuan Arsenal an la ṭha hret.

Mikhual team Brighton hian first half-a an chance neih, an chhawr loh an tuar, tiin a sawi theih bawk. Georginio Rutter chance duhawm chu Gunners second choice keeper Kepa Arrizabalaga chuan ṭha zetin a dansak a, striker Stefanos Tzimas chuan uiawm takin a chance neih a hlah bawk - a ui vawng vawng ang.

Brighton-in team ṭha laka chance neih chhawr loh pawizia chu a takin second half-ah an tem zui a, minute 57-naah Myles Lewis-Skelly-a siamsak chu Ethan Nwaneri chuan goal-ah a chantir a, bench aṭanga luhtir Bukayo Saka chuan Harriman-Annous-a shot aṭanga ball per chu chak nemngheh nan a khung ve leh bawk.

Premier League hmahruaitu Arsenal boruak ṭhat vanglai tak a ni a, an match hnuhnung 11-ah an tlawm lo tawh - match ruk chhung goal chhuah an nei lo bawk a, Mikel Arteta-a'n European football-a team hmachhawn châkawm lo ber pawl a din mek.