Chawhma dar 9-ah Manipur Vs Mizoram

Sub Junior Boys National Football Championship-ah vawiin chawhma dar 9:00 hian Mizoramin leh Manipur te an inkhel dawn a, NorthEast football powerhouse nih inchuh state pahnih hian semifinal khel tur an zawng dawn. Mizoram hian an elpui Manipur aiin goal an khung tam zawk a, hei vang hian semifinal turin 'draw' a tawk a, hna awlsam erawh a ni dawn lo. Inkhel hi SportsKPI youtube channel-ah a en theih ang.

Inelna hi Amritsar, Punjab-ah khelh a ni a, khelmual hi natural grass a nih avangin artificial turf-a inkhel ṭhin Mizoten an ṭhatna ber an pholang thei lo. Mahse, match hmasa pahnih aṭangin khelmual kalhmang an zirchiang tawh dawn a, inkhelh dan pawh an thiam tawh zawk ang.

Mizoram team hi coach K. Lalrindika kaihhruai a ni a, Dika hote hian Odisha 13-0 a an hneh bakah Bihar 11-2 in an sawp. Tun inelnaah Mizoramin goal 24 an khung tawh a, an goal chanve tawp hi Zemabawk North naupang Jacob Malsawmsanga khung a ni. Jacob hi kum la naupang mah se football chanchin ngaihnawm a nei der tawh a, Reliance Academy-ah a awm mek.

Jacob hi Naupang League a khelh laiin 2023-24 season RFYC Naupang League Season 2 U12 leh Inter District-ah top scorer a ni ve ve a, 2024-2025 season-ah Under 14-ah khelin Naupang League-ah top scorer a ni leh bawk. Zemabawk North naupang hian Naupang League an khelh laiin RG Stadium aṭangin kein an veng thleng a haw fo bawk.

Mission Veng/Khawlailung forward Lalruatfela pawh hi Reliance Academy-ah a awm tawh a, midfielder pawimawh Kulikawn naupang Abraham Malsawmhlua pawh Roundglass Academy-ah a awm mek a, an chawlh hun lai Mizoramin an chang thei hi a vanneihthlak hle - heng player-te hi an khelhpuite nen hian Naupang League aṭanga inzir chho an ni a, kum naupangte aṭanga inkhel an nih hlawm avangin an kum naupang mah se khelmualah an tlangnel.

Mizoram tan point khat chauh tawk mah se draw tuma inkhelha goal chhuah leh si hian insiamṭhat a harsa ṭhin. An khingpui Manipur hi thahrui an ngah a, team ṭha tak an nih bawk avangin coach Dika leh a thawhpuiten ngaihtuahna an sen uluk a, thutlukna dik an siam a ṭul ang.