Champion lai Magpies an chak

League Cup nomawi kawltu Newcastle United-in an nomawi humhim tumin kawng dik an zawh zel a, round of 16-ah team ṭha Tottenham Hotspur hmachhawn mah se, 2-0 in hnehna an chang.

Kum 70 zet nomawi an chawi loh hnuah season hmasa khan Magpies hian League Cup-ah nomawi an chawi a, mahse, an champion theih nana player thawhhlawk Alexander Isak-a'n British transfer record fee-in Liverpool a pansan.

Magpies-in an nomawi humhim loh erawh an tum phah lo a, captain Bruno Guimaraes chuan inkhelh hmain League Cup-ah champion leh ngei an tum thu a sawi - head coach Eddie Howe-a'n an match hnuhnung ber aṭangin player pariat ngawt siksawi mah se, Newcastle-in an thusawi umphak an tum.

Team pahnihin player pasang tak tak an kawl ve ve a, a tawpah erawh Magpies an zuang sang zawk - minute 24-naah centre back Fabian Schar chuan Sandro Tonali corner aṭanga ball kal chu amah vengtu Lucas Bergvall aia zuang sang chungin a tauh lut.

Newcastle hian an la duhtawk mai lo. Striker pasang Nick Woltemade chuan Joe Willock-a siamsak chu a tauh lut ve leh a, Magpies a pan hnuah match 11 aṭangin goal ruk ngawt a khung ta.

Spurs hian si phurh sutna remchang nei mah se, midfielder Pape Sarr-a hun duhawm chu Aaron Ramsdale chuan ṭha zetin a dansak a, Magpies tan Harvey Barnes chuan bar a tihper bawk.