Damdawi mamawh City tan damna!

Aston Villa laka an tlawm hnua an match hmasa berah Manchester City chuan goal thum an khung a, an mikhualna ramah Swansea City chu 3-1 a sawpin, League Cup-ah quarterfinal an lut.

Championship club Swansea hian rin loh takin, Goncalo Franco hmangin goal an khung hmasa zawk a, minute 12-na lekah Pep Guardiola team hi an barakhaih.

Mahse, City an hnufual rei lo. Jeremy Doku chuan minute 39-naah si phurh a sut a, second half-ah Omar Marmoush leh Ryan Cherki ten an khung belh leh bawk - player pahnih hi hliam vanga an chawlh hnua lo kir leh ve ve an ni.

City boss Pep Guardiola-a'n Villa laka tlawm team aṭangin player 10 a siksawi a, a tisual dawn emaw a inti hman ang! Goal an chhuah hmasak hnuah Abdukodir Khusanov-a chetsual zar zoin Melker Widell chuan Swansea tan khung belh theihna remchang a nei a, mahse, James Trafford-a'n a dang hlauh.

Cherki-a'n si phurh sut theihna remchang a neihah post a pet per a, mahse, Doku-a'n si phurh a sut zui ta tho - City-in inkhel thunun zuiin, Marmoush-a'n a khung belh a, Cherki-a'n hun pek belhah chakna goal a khung zui.

League Cup quarterfinal-a inhmachhawn tur team a hriat nghal a, City hian Brentford an hmachhawn dawn - Cardiff City chu Premier League club ni lo zinga la dam awmchhun an ni tawh.