Inter leh Juventus an chak

Juventus chuan an coach Igor Tudor an ban hnua an match hmasa berah Udinese 3-1 in an hneh a, match riat chhung ngawt mai chak ni hmel hmu miah loa an kal tawhna chu an thai bo, point thum an hmu ve leh ta a ni.

Nilaini zan inkhel dangah Inter Milan chuan Fiorentina chu 3-0 in an hneh ve bawk a, champion lai Inter hian tun dinhmuna hmahruai mektu Napoli nen an inkar chu point thumah an sawr zim leh ta phawt.

Juve an chak

Tudor-a enkawlna hnuaiah Juventus an che hleithei lo - September laihawl hnu lamah khan an la chak leh loh avangin Tudor hi an ban hial, junior team enkawltu Massimo Brambilla chuan Juve hi a enkawl lailawk a ni.

Boruak thar an hip a, khelmual chhunga player-te chet dan pawh a danglam. Juventus tan hian Dusan Vlahovic leh Kenan Yildiz ten penalty an khung bakah Federico Gatti chuan a khung belh a, mikhual tana Nicolo Zaniolo goal khungin awmzia a nei lo.

Juventus hian nimin tlai thleng kha chuan coach nghet an la nei lo. Italian chanchinbu rintlak te chuan Old Lady hian Luciano Spalletti an la lut dawn niin an ziak a, nizan khan inremna an lo nei hman tawh hial mai thei.

Juventus adviser Giorgio Chiellini chuan, "Spalletti hi tunlai mila football khelh thiam coach ṭha tak a ni a, tawnhriat a nei ṭha bawk. Lehkhaa ziah fel a la nih loh avang erawh chuan kan nghah rih a ngai," a ti, coach atan an la dawn tih a chiang.

Hmalam pan Inter

Season tir lamah Inter Milan che buai ve deuh mah se an buai rei lo - Cristian Chivu naute hian Fiorentina 3-0 in an hneh, mualneitu tan hian Hakan Calhanoglu-a'n goal hnih a khung bakah Petar Sucic chuan goal khat dang a khung belh bawk.

Inter Milan coach Chivu chuan, "Team lian Inter Milan kan nih chuan harsatna paltlang dan, chumi hnua hmachhawn leh dan pawh kan hre tur a ni a, tunlaia kan thawh chhuah leh dan hian min tilawm hle.

"Fiorentina kha an inveng thiam hle a, kan tih theih ṭha ber chu counter attack aṭanga beih let kha a ni a, kan hmanraw neih theih kha kan tihlawhtling," tiin a sawi a, a naute khelh danah a lungawi hle tih a sawi lang tel bawk.

Inter Milan hi pathumna an ni mek a, an chungah AS Roma leh Napoli te an awm. Season hmasa khan Antonio Conte nauten an title an chhuhsak a, kuminah laklet ngei tumin thapui an thawh, nomawi inchuh boruak a sang chho dawn tih a chiang.