PSG an chak zo lo

Paris Saint Germain chu an mikhualna ramah Lorient nen 1-1 in an inhnehtawk - Paris club hian hliam vangin Desire Doue an chân a, engtiang chena rei nge a chawlh dawn tih erawh hriat a la ni lo.

Stade du Moustoir-a inkhelah, mikhual PSG tan Nuno Mendes chuan minute 49-naah a khung a, goal luh aṭanga minute hnih hnu lekah Igor Carioca chuan a sut ve nghal, goal dang luh belh loin point khat ve vein an insem.

PSG tan kum 20 mi Doue chu a inlan ve leh thei tawh - September thlaa France tana a feh chhuahna lama a hliam kha a dam tawh, mahse Lorient lakah hian a malpui hliam vangin lak chhuah a ngai leh ta a ni.

Paris club manager Luis Enrique chuan, "Hliam neih hi chu engtik lai mahin chanchin ṭha a ni thei lo. Doue-a hliam kha eng ang taka na nge a nih ka la hre lo, mahse a lan danah kha chuan a na angreng niin a ngaih theih," tiin a sawi.

Doue hian season hmasa kha a hmang ṭha hle, goal 16 a khung bakah a ṭhiante khung tur vawi 16 bawk a siamsak. Tun season erawh hliam vangin a buai viau, tun ṭuma a hliam hma hian match parukah a inlan theih loh phah tawh bawk.

Hliam a neih loh chuan PSG tan a rintlak ṭhin hle, kar hmasa mai pawh khan Bayer Leverkusen nen Champions League an khelh ṭumin goal hnih a khung a, chumi hnuin Brest lakah goal a khung zui bawk, tunah erawh hliam vangin a chawl leh rih ang.

Chak zo lo mah se PSG hi Ligue 1 hmahruaitu an ni chhunzawm, anmahni hnaih bertu Marseille chu Angers nen 2-2 in an inhnehtawk. Nantes hnehtu AS Monaco chuan point 20 hmuin Paris club hnuaiah chiah an rawn kang chho a ni.