Sindhu tan season a tawp

PV Sindhu chuan tun season chhungin tournament a khel dawn tawh lo, inelna lo awm leh tur aṭangin a inhnukdawk vek - a ke hliam enkawl a duh a, nakkumah ṭha zawka inkhelh theih a beisei vang a ni.

Kum 30 mi Sindhu hi hliam vangin a buai fo a, a doctor Dinshaw Pardiwala nen uluk taka a dinhmun an sawi dun hnuah inkhel rih lo turin thu an titlu a, training erawh a theih angin a nei chhunzawm thung ang.

Olympic medal vawi hnih dawng tawh Sindhu chuan, "Hliam vanga inenkawl hi chu a hrehawm, infiammi tan chuan match khel thei loa awm hi a hrehawm ṭhin takzet. Tun hma aia ṭha zawka lo kir leh tumin ka bei ang," tiin a sawi.

Indian shuttler Sindhu hian hlawhtlinna tam tak a lo chang tawh, kum 2019 khan world champion pawh a lo ni hial tawh a, tun hnaiah erawh hliam leh harsatna hrang hrang vangin result a nei ṭha tawk lo a ni.