Ṭawiawm phu Chanmari fapa rangkachak

Chanmari FC hian MPL5 hnuah nomawi an la chawi leh lo a, MPL10 final-a Mizoram Police an hneh loh kha champion boruak an tem hnuhnun ber a ni. Tun ṭumah erawh an veng fapa rangkachak Rochhingpuia hoin final an lut a, Chhinga hi player leh coach anga champion thei hmasa ber ni thei dinhmunah a ding.

Chanmari coach Chhinga chuan, "Sawi hian a siak lo a, champion hi ka châk khawp mai a. Player angin ka lo champion tawh a, player anga champion tawh coach anga champion hi an awm loin ka hria a. Chuvangin a hmasa ber te pawh ka ni thein kan inhria a, amaherawhchu chumi tur chuan kalkawng hahthlak tak ka hmachhawn dawn tih ka hria. Ka phurna hi a nasa khawp mai a, hman deuh khan fapa ka nei a, fapa ka neiha ka lawm tluk zetin ka lawm ka ring," tiin a sawi.

Chhinga hi club inelnaa MPL, I Day Football, MFA Cup leh MFA Super Cup-a Chanmari FC champion pui tawhtu a ni a; veng inelnaah Red Ribbon Football leh CYMA Football thlengin an veng hi a champion pui tawh. Chhinga hian champion a châkzia a sawi chiang a, Chanmari mipui han an veng fapa rangkachak hi a duh a thlen theih nan an ṭawiawm a pawimawh hle.