Chelsea khelmualah Spurs leng dawn

Premier League inkhel ngaihven hlawhah Tottenham Hotspur chuan zanin dar 11:00 hian Chelsea an mikhual dawn a, London derby ngaihvenin football khawvel chuan Tottenham Hotspur Stadium lam a hawi ang.

Chelsea-in season hmasaah Europa Conference League nomawi an chawi a, Club World Cup-ah an champion zui bawk. Beiseina sang tak nen season bul an ṭan a, mahse, tluk leh din fawmin hun an la hmang rih!

Europa League champion Tottenham Hotspur-in nomawi chawipuitu coach Ange Postecoglou meuh banin, Thomas Frank hoin season bul an ṭan a, table-ah pathumna dinhmun an luah mek.

Blues an buai

Chelsea hi player inhliam an ngah avangin an buai ru hle - an league match hnuhnung berah Sunderland chu 2-1 in an ngam lo a, League Cup-ah Wolverhampton Wanderers hneh mah se, goal thum an chhuah avangin tlarhnung a nghing tih a chiang.

Tlarhmaah Joao Pedro-a 'form' lo a, a fitness a ṭha tawk lo bawk. Hetiang boruak karah hliam vanga rei tak a chawlh hnuin Liam Delap lo kir mah se, ṭul lo takin Wolves lakah red card a hmu a, zaninah chhawr theih a ni dawn lo.

Chelsea boss Maresca-a'n, "Khatiang red card kha chu hmuh loh theih a ni," tiin a player chet dan a dem a, Pedro-a'n Spurs lakah mawhphurhna a lak a ṭul a, a chungah Blues ṭantute mit a fu ang.

Hliam ngah Spurs

EPL club zingah Spurs hian player inhliam an kawl hnem ber hial mai thei - Destiny Udogie, Ben Davies, Radu Dragusin, Kota Takai, Yves Bissouma, Dejan Kulusevski, James Maddison leh Dominic Solanke te chu tuna hliam an kawl mek a ni.

Spurs hian Frank-a hnuaiah tichhe hran lo mah se, an match hnuhnung paliah vawi khat chiah an chak. EPL-ah Aston Villa ngam loin, Champions League-ah AS Monaco an draw a, League Cup-ah Newcastle United-in an pet chhuak.

London club hian November-ah Manchester United, Arsenal leh Paris St-Germain an la hmachhawn dawn bawk a, Frank-a'n an hmabak match-ah a naute inrintawkna nei tura a duh a nih chuan Chelsea hneh hi an tan a pawimawh ang.