Lisandro a la awl rih dawn

Manchester United-in zanin dar 8:30 hian City Ground-ah Nottingham Forest an hmachhawn dawn a, Ruben Amorim-a hoten an chak record chhawm nun zel an tum ang.

United tan Lisandro Martinez-a'n training a zawm tawh a, mahse Argentine defender hian inkhel turin hun a la mamawh deuh dawn. Liverpool laka chakna goal khungtu Harry Maguire dinhmun a chiang lo a, player dang erawh an dam ṭha thung.

Amorim-a hote hian match hnuhnung berah Brighton 4-2 in an hneh a, a zawnin vawi thum chak tawhin table-ah pawh a chunglamah an awm. December 21, 2025 - January 18, 2026 thlaah Africa Cup of Nations khelh a nih dawn avangin player pawimawh Bryan Mbeumo leh Amad Diallo te an chhawr thei lo a, hei vang hian an kim ṭhat laia chak hi a pawimawh hle.

United khingpui tur Forest hian coach pahnih Nuno Espírito Santo leh Ange Postecoglou te an ban tawh a, tunah hian Sean Dyche-a hnuaiah an khel mek. Forest hi league match hnuhnung paliah an chak lo vek a, manager thar Dyche-a hnuaiah pawh league match bikah chuan an la chak lo vek tihna a ni.