India tan Rodrigues-i a langsar Pathian a chawimawi zui nghal

India hmeichhe cricket team chuan tih theih loh tura ngaih an ti thei a, team ṭha Australia chu wicket nga a hnehin Women's Cricket World Cup 2025 final an lut - Pathianni tlai dar 3:00 aṭangin South Africa nen final an khel ang.

DY Patil Stadium, Mumbai-a semifinal inkhelah Australia chu ṭhum vawrah vannei zawkin vuak hmasak an thlang a, run 338 tehmeuh siamin Women’s ODI huanga target sang ber an siam.

Mipa leh hmeichhe Cricket World Cup huap pawhin, knockout stage chinah chuan target san ber ṭum a ni hial. India tan umphak chu thil huphurhawm tak a nih laiin Jemimah Rodrigues hoin an um a, ani hian ball 134 a hmachhawn aṭanga run 127 tehmeuh siamin a out lo, ropui takin India a chakpui.

Kum 25 mi Jemimah Rodrigues chuan, "A hmasa berah chuan Pathian hnenah lawmthu ka sawi, hetiang thil hi chu keimah maia tih theih a ni lo, ama min hruaina vang chauh a ni zawk.

"Exodus 14:14-ah chuan, 'LALPAN a dosak ang che u, nangni chu in awm hle hle mai ang,' thu ang khan a ni. Ka rilru leh taksa a chau a, kei chu khelmual chhungah khan dingin Ani chuan min beihsak," a ti.

India leh Australia an inkhelh hun hi Ocotober 30, Ningani zan a ni a, tun ṭum an intawn hma ni 10 lekah kha chuan England an tum dawn ṭumin tel tur pawhin an thlang lo, mahse tunah erawh India chu final a thlenpui ta a ni.

Group stage an khelh laiin India hian Australia hi wicket thumin an hneh lo, semifinal-ah erawh an hneh. Final-a an tum tur South Africa pawh hi wicket thum bawka an hneh loh hnu an ni a, thil mak thlen tir leh an tum ang.