Juventus coach thar Spalletti

Manager an ban aṭanga kar khat pawh a liam hmain Juventus chuan coach thar an nei, a hming chu Luciano Spalletti a ni - Italian manager hian tawnhriat a nei tam tawh a, a mikhual dawn hran lo.

Old Lady hian tun kar tir mai khan Igor Tudor chu an coach a nihna aṭangin an ban, match riat chhung chak ni hmel an hmuh loh hnuah an inṭhen a, kar laihawl khan Udinese chu 3-1 a hnehin an boruak an siam ṭha.

Coach thar Spalletti hian tun season tawp thleng atan contract hi a ziak a, an inrem dan chuan season tharah Champions League khel tura an tling phak a nih chuan an inremna hi kum khat dang atan pawhsei leh nghal theih a ni ang.

Kum 66 mi Spalletti hian 2022-23 season khan Napoli chu Serie A nomawi a lo chawi pui tawh a, chumi hnuah an ram Italy a enkawl - Azzurri tan erawh sulhnu ropui tak a hnutchhiah hman ta chiah lo.

Italy hi World Cup 2022 khel turin an tling lo, chutih laia an coach chu Roberto Mancini a ni. Mancini a chhuah hnuah Spalletti a rawn lang a, ani hian Euro 2024 khel turin tlin pui mah se last 16-ah Switzerland hneh loin an tla.

World Cup qualifying an khel ṭha lo zui a, hei vang hian June khan Italy coach a nihna aṭangin an ban. Inter Milan, AS Roma leh Udinese te a enkawl tawh avangin Italian football a hrechiang a, tunah chuan zinkawng thar a zawh dawn ta a ni.

Juventus hian kar laihawla Udinese an hneh ṭum khan an khel ṭha tlang a, team enkawltu chu junior team coach Massimo Brambilla a ni. An boruak fuh chho leh chiah hi Spalletti tan hna thawh ti nuamtu a ni thei ang.

Tun dinhmunah Old Lady hi Serie A table-ah pasarihna an ni mek a, match kua an khelh tawh chinah hmahruiatu Napoli chu point rukin an phak lo. Champions League-ah 25-na an nih mek avangin insiamṭhat an mamawh hle.

Spalletti an neih avanga phur thar Juventus hian zanin dar 1:15-ah an hnuai chiaha awm Cremonese an lenchilh dawn a ni.