Vini-a'n ngaihdam a dil

El Clasico-a lakchhuah a nih avanga a lungawi lohna lantirtu, Real Madrid forward Vinicius Jr chuan Spanish club ṭantute hnenah ngaihdam a dil a, a thiam loh a nih thu a sawi.

Vini chuan, "Khelmual aṭanga lakchhuah ka niha ka chet dan avang khan Madrid ṭantute zawng zawng hnenah ngaihdam ka dil a ni. Club training-naa ngaihdam ka dil tawh ang khan, ka ṭhian, ka khelhpui te, club leh President chungah pawh ngaihdam ka dil a ni," a ti.

Kum 25 mi forward chuan sawi zawmin, "Ka team tana tha thawhtu nih a, hnehna chan ngei ka duh ṭhin a, chuvang chuan ka ngaihtuahnate hian a chang chuan min hneh ve leh ṭhin.

"He club leh a zawmpui zawng zawngte ka hmangaih em avangin, khatiang khan ka che ta mai a ni," a ti - inkhelh zawh khan coach Xabi Alonso chuan Vini chet dan chu an ngaihtuah tur thu a lo sawi tawh.

Vini hian season khat dang bak Santiago Bernabeu-ah hian contract a nei tawh lo a, Real-in contract thar an zawrh chungchangah an la inrem theih loh avangin chhuak thei dinhmunah a ding mek.

Spanish media ṭhenkhat chuan Real hi man man taka dawrtu an hmu a nih chuan Vini chhuahtir hi an pawi ti dawn lo niin an sawi a, Real tana match 335-a goal 111 khungtu hi season tharah club dang jersey nen kan hmu thut a nih pawhin a mak lo ang.

Mahse, Vini chuan, "He club ka zawm tirh aṭanga ka tih fo ṭhin angin, second tin hian he club tan ka bei zel ang," a ti!

Vini hian kum 2018 khan Real Madrid hi Flamengo aṭangin pound maktaduai 38.7-in a zawm a, Ballon d'Or a dawn loh avanga thawm lo nei hat tawh forward hi a chhuak dawn a nih chuan pound maktaduai 100 man chuang a nih a ngai ang.