Chanmari zawng, an lo Chanmari em a ni!

GIG Motors MPL12-ah football hmuhnawm thlir tur a awm a, Covid-19 hnua league round-a mipui a hip ṭum ni mah se MPL ṭantirh lam a pha lo. Ṭantu nei ṭha Chanmari meuh pawhin semifinal-ah ṭantu an la nei lo a, mah se final a thlen meuh chuan RG Stadium-ah an zia an rawn chhuah a, 'Chanmari nge nge' tih mai lo chu tih theih dang a awm lo.

Nomawi duha tuihal Chanmariin final hmain boruak an siam ṭan a, final pual video siamin, hei hi boruak tialh chhotu zinga mi a ni. MPL ṭantirh aṭanga Chanmari ṭantu ruhkawl leh an veng pa Rosiamngheta chuan, "2-1 in kan chak dawn a, Aizawl FC hi chu nghah chhan mumal nei lo an nia. Keini chu veng thlarau nena inzawm tlat a nih avang hian kan player-te an huaisen a, chuvangin zing thawh phat aṭang hian min ngam lo hrim hriam ang," a ti a, final khelh ni zingkar aṭangin an inhrosa ṭan.

Final thlen meuh chuan RG Stadium-ah kawr pawl ha an tam a, banner lian hmuh tur a awm a, khuang lian a awm a, halpuah leh halmawi thlengin a awm vek. Chanmari hlapui 'Shabash Hallelujah' ri hriat tur a awm a, sound system hmanga zai tir ni loin mipui sak nghat a ni.

Aizawl FC lam pawhin ṭantu an nei ṭha tho a, netural fan pawh an tam. MPL history-a final entu tam ber ṭuma chhal ngam a ni a, official record-ah chuan mipui 15,000 pungkhawm angin an ziak. I League inkhel zawng zawng chhiar tel vekin RG Stadium-a mipui punkhawm tam ber ṭum a ni hial ang.