Goalkeeper 'Best player' atana thlan hmasak ber T. Mawia

GIG Motors MPL12-ah Chanmari FC goalkeeper Zothanmawia chu best goalkeeper-a thlan a ni a, College Veng pa hi best player-a thlan a ni bawk. T. Mawia hi MPL history-a best goalkeeper hmasa ber a ni a, Chanmari FC champion-na kawnga a pawimawh avangin a phu a ni.

T. Mawia hian MPL hmasa berah Dinthar FC a champion pui a, MPL7-ah Aizawl FC champion puiin best goalkeeper a ni tawh bawk. College Veng goalkeeper hian tun season-ah match khat chiah a khel lo a, clean sheet vawi riat neiin goal 12 chiah a chhuah a, goalkeeper ni chung siin semifinal-ah assist pawimawh bik a nei bawk.

Emerging player-ah Chanmari left back F. Malsawmtluanga thlan a ni a, Lunglei Zobawk rawlthar hi season liam ta khan SYS FC captain niin Rochhingpuia hnuaiah rinrawl a ni.

Mimal lawmman dang erawh Aizawl FC-in an hui vek a, R. Lalruatfela hote hi season tluana che ṭha an nih avangin an player-ten mimal chawimawina an hui hi a mak lo. AFC bang rinawm Rohmingthanga chu best defender a ni a, Mission Veng tlangval hi I League club tan hotu ṭha tak a ni tel bawk.

MPL11 final-a goal awmchhun khungtu Lalawmpuia Sailo-in best midfielder chawimawina a dawng a, Dinthar tlangval hi game siamtu a nih bakah goal li a khung. Goal 18 khungtu Zomuanpuia'n a phu ang ngeiin best forward chawimawina a dawng a, Khawbel tlangvalin season ṭha bik hmangin best forward bakah top scorer chawimawina a dawng bawk.