Liverpool an tho ve leh ta

Premier League match li zet a zawna an tlawm hnuah Liverpool an tho ve leh ta a, match li zet a zawna chak tawh Aston Villa chu 2-0 in an hneh.

Liverpool tan 'Egyptian King' ti meuha hming lem an pek Mohamed Salah a la pangngai reng a, first half hun pek belhah goal hmahruai khungin, second half-ah Ryan Gravenberch chuan a belhchhah bawk.

Reds-in hnehna an chan avangin inrintawkna an nei let ang tih a chiang a, Thawhlehni zan dar 1:30-ah Champions League match khel tura Real Madrid an mikhual zui dawn avangin a hun takah result ṭha an hlawh chhuak, tiin a sawi theih.

Hlauhthawnna

Anfield-a inkhelah Aston Villa an hlauhawm hmasa a, tun hnaia beisei ang result nei lo Liverpool fan-ten an hlauthawng hle - Morgan Rogers chuan minute ngana lekah post a pet per dawp a, Matty Cash-a chance neih pawhin Virgil van Dijk a per hnuah, keeper Giorgi Mamardashvili chuan bar a lo nam per!

Villa hi league match hnih a zawna Tottenham Hotspur leh Manchester City hneh thei an ni a, Anfield-ah an inringtawk hle. Mahse, Liverpool fan-ten coach Arne Slot an thlawp a ni tih lantirin, a hming lamin an zai a, boruak a ṭha hle.

Fans boruakin Liverpool player-te inrintawkna a pe tih a chiang a, an khel ṭha tulh tulh. Khel ṭha em em mai Dominik Szoboszlai-a chance neih vawi hnih chu Villa keeper Emi Martinez-a'n ṭha zetin a dansak a, Hugo Ekitike tauh luh pawh offside vangin pawm a ni lo.

A hming Salah

Mahse, Liverpool hi dan reng theih an ni lo. First half hun pek belhah Villa keeper Martinez a chesual a, a ball petchhuah sual chu Salah-a ke bulah ber kher a tla a, kum 33 mi forward hian hmahruaina goal ni turin a khung.

Tun season-a sawisel hlawh tak Salah-a'n match hnih chu a zawnin goal a khung leh ta a, inelna hrang hrangah match 14 khel tawhin, goal nga a khung bakah assist vawi thum a nei tel tawh bawk.

Salah hian Liverpool tan match 415 aṭangin goal 250 a khung tling ta a, assist vawi 116 a nei tel. Liverpool legend Ian Rush (346 goals) leh Roger Hunt (285) hnua Reds tana heti zat goal khung leh thei hmasa ber a ni.

Hello Ryan

Liverpool tan Ryan Gravenberch chu kerek hliam vanga match thum ngawt a khelh loh hnuah a lo kir leh ta a, Dutch midfielder hian Reds tana player pawimawh a nih chhan pholangin, chak nemnghehna goal a khung.

Gravenberch-a hoin Liverpool midfield a nghet sawt a, a awm loh chhungin Reds-in an ngai hman hle tih a lang. Szoboszlai bawk a hmuhnawm a, Hungarian midfielder hian a 'class' a pholan chhunzawm zel.

Milos Kerkez aia bul ṭantir Andy Robertson-a'n Liverpool tana khelh tam a la phuzia a pholang nawn a, kum 33 mi Salah a 'form' leh ta bawk - Liverpool fan-ten hahdam takin Pathianni an hmang ve ta e!