Chelsea-in Spurs an hneh

Match sawm zet goal a khung loh hnuah Joao Pedro chuan Blues tan goal a khung a, a goal khungna hi an hmelma kumhlun Tottenham Hotspur lakah ber kher a nih avangin a hlu lehzual.

Inrinni zan khan Spurs khelmualah Chelsea an lenglut a, minute 34-naah Pedro hian goal a khung - Blues midfielder Moises Caicedo-a nawrna lamah Spurs defender Micky van de Ven a chesual a, Caicedo chuan Pedro tan a siamsak zui.

Kum 24 mi forward hian hnai set sawtah chiang zetin a khung a, 1-0 a ni. Brazilian forward hian first half-ah ringawt hattrick siam theihna chance a nei hial a, mahse, Italian keeper Guglielmo Vicario chuan a chance neih dang vawi hnih chu ṭha zetin a dansak.

Hei chauh a ni lo. Mikhual team tan hian Pedro Neto leh Enzo Fernandez ten an chance neih uiawm takin an hlah a, bench aṭanga luhtir Jamie Gittens chuan hnai set sawt aṭangin a thlawh over a, Pedro pawh Vicario bawkin a hlawhchhamtir.

A tawpah erawh Chelsea tan goal khat chu chak nan a tawk a, Blues khelh ṭhat piahlamah Tottenham beisei phak loh vang a ni tel - minute 90 chhungin Spurs hian vawi thum chiah shot an nei ve!

Spurs-in shot an neih vawi thum hi Mohamed Kudus-a shot vek a ni - a shot vawi khat chu block sak a ni a, vawi khat a thlawh over a, vawi khat chu Chelsea goalkeeper Robert Sanchez-a'n a dansak thung.

Tottenham tan Xavi Simons, Richarlison, Randall Kolo Muani, Brennan Johnson leh Wilson Odobert te lut vek mah se, shot an nei lo vek - bench aṭanga luhtir Simons hi minute 17 a la awm tihin lakchhuah leh a ni hial!

Spurs hian anmahni khelmual an hmang thiam lo em ni chu aw, tih mai tur a ni a, Tottenham Hotspur Stadium-a an match hnuhnung 19-ah vawi thum chiah an la chak - chawlhlawk hmang tura an chhuah lai leh inkhelh zawh hnuah fan-ten nasa takin an au el hial.