United an chak zo leh ta lo!

Match thum zet a zawna an chak hnuah Manchester United-in a zawna vawi li chak beisei mah se, Nottingham Forest khelmualah an chak zo lo a, 2-2 in an inhnehtawk.

United tan harhtharna chang Casemiro-a'n a harhna chan a chhunzawm zel a, Bruno Fernandes-a corner aṭanga ball kal chu chiang zetin a tauh lut - Red Devils ṭantuten chak an lawm ngei dawn niin an hre hman.

Mahse, goal dang lut loa chawlhlawk hman a nih hnuah, second half minute nga chhungin engkim a inthlak danglam zui - minute 48-naah Forest captain Morgan Gibbs-White chuan amah vengtu Amad Diallo aia tharum a ngah zawkna chhawr ṭangkaiin, Ryan Yates-a cross chu chiang zetin a tauh lut.

United an insiamṭha hman lo. Forest-in minute hnih hnuah an goal hnihna an khung zui. Igor Jesus-a ball tauh chu United player-ten lo dang per mah se, a per lehlam hi Nicolo Savona chuan rang takin goal-ah a lo chantir zui.

Mahse, he United hi season ṭantirtêa United kha an ni tawh lo - tlawm rilru pu duh loin, huaisen takin Forest an bei let a, Bruno Fernandes-a'n uiawm takin post a tihper.

Amad Diallo erawhin a hlah ve lo - minute 81-naah Forest tlarhnung lamin ball an tauh chhuah chu penalty box pawn aṭangin, ṭha zetin a hlap lut a, Forest keeper Matz Sels tan tih theih a awm lo.

Kum 23 mi Amad hian hun pek belhah chakna goal khung theihna remchang a nei a, mahse, a khung ngei tur nia lang chu Murillo chuan goal line aṭangin a lo dang a, 2-2 in inkhel a tawp.