MFA U17 final-ah Aizawl FC leh SYS FC

Zawlbuk Zodin Memorial MFA Under 17 League semifinal chu November 1, Inrinni khan RG Stadium-ah khelh a ni a, Aizawl FC leh SYS FC ten an khingpui hnehin final an lut. Nomawi inchuhna hi November 4, Thawhlehni tlai dar 4:00 hian RG Stadium-ah khelh a ni ang.

Aizawl FC-in awmze neiin team an kalpui tih a lang a, Mizoram Premier League-ah an senior team-in record ṭhahnem tak an siam bakah Under 17-in MFA U17 inelnaah final an lut. AFC hian final lut turin Dinthar FC 3-1 in an hneh a; Vanlalnghaka, Francis Lalhruaizela leh H. Lalruatdika ten goal khat ṭheuh an khung.

Chutihrualin champion tura rinkai erawh SYS FC club an ni a, Mizorama football zirna changtlung ber SYS hian semifinal-ah Kanan FC 9-0 in an sawp. SYS player tam zawk hi Regional Sports Training Centre, Saidan-a mite an ni a, tun inelnaah an chak chiang ṭhin hle.