Kananin MPL khel zel dawn

GIG Motors MPL12-ah Kanan FC che ṭha tawk lo mah se First Division club lakah erawh an la chungnung hle. Samson Ramengmawia kaihhruai Kanan hian MPL playoff first leg-ah Ramhlun North 4-0 in an hneh tawh a, Inrinni khan second leg khelh niin 7-3 in an chak leh bawk.

RG Stadium-a inkhelah hian Kanan an chungnung a; F Lallawmkima, Lalthanzuala , J Lalbiakliana leh Lalthuthlunga te hmangin second half ṭantirhah 4-0 a ni tawh a, aggregate-ah 8-0 a ni tawh. Ramhlun North lamin Royal Moses sut ṭhen ve bawk mah se Kananin TZ-a leh rawlthar duhawm K. Hmingthanzuala goal hnih hmangin an khung belh a, second leg-ah 7-1 a ni hman.

Hun tawp dawn hnaiah Ramhlun North-in Henry Malsawmtluanga goal hnih hmangin siphurh an sut ṭhen a, result danglamna ni loin scoreline tilang mawitu chauh a ni. Aggregate-ah Kanan 11-3 in an chak a, MPL an khel zel dawn.

MPL13 club khel tur pariat a chiang a, Aizawl FC, Chanmari FC, MLS FC, Dinthar FC, Saikhamakawn FC, Mizoram Police, Ramthar Veng (Qualifier champion)leh Kanan FC ten an khel dawn.