Zanin RG Stadium-ah hmuhnawm leh ennawm Chhinga Veng Vs Electric Veng

Mizoram Premier League Season 8 semifinal hnuhnung zawk chu zanin dar 7:30 hian Chhinga Veng leh Electric Veng ten an khel dawn. Team pahnih theihna thlirin hmuhnawm leh ennawm thlir tur a awm ngei ang.

Chhinga Veng hian pathumna nichungin MPL league round an khar a, amaherawhchu an hnuai chiaha awm Electric Veng FC an hneh loh avangin semifinal ticket an neih har phah. MPL8-a vawi hnih an inkhelhah vawi khat ve ve an chak a, an intluk tawk tih a hriat theih.

Electric Veng coach Lalsangzuala Hmar chuan, "Chhinga Veng hi kan intawn hnuhnun bera kan hneh avangin semifinal-ah kan dinhmunah a ṭhat phah lo. Rinkai zawk hi vote la ta se, vote kan hmu sang lo khawp ang," tiin Chhinga Veng buk a rih zawk thu a sawi.

Sanga sawi hi a dikna chen awm bawk mah se position tina team pahnih khaikhinin buk rit zawk an awmin a lang lo. Chiang taka hriat theih erawh team pahnihin ball thiam an kawl ve ve a, passing game khel ṭhin an nih bakah game rang taka an khelh avangin a hmuhnawm dawn.

Chhinga Veng hian MPL6 thunun chungin nomawi an chawi a, season liam ta erawh MFA Super Cup leh I Day Football nomawi humhim mah se MPL final-ah Aizawl FC an hneh lo. Tun season-ah coach Sanga leh player langsar ṭhenkhatin an chhuahsan a, chutichung chuan team ṭha ber zinga mi an ni zel.

Anand Gurung leh Lalremruata ten tualchhung football an hriatchian rah an seng a, chumi thlawp tur chuan club board lamin an mamawh goalkeeper Dharminder Guru leh forward Ouattara Sie te an laksak avangin champion thei tur khawpin an ṭha.

Coach Anand chuan, "Kan dam kim a, first leg-ah hian result ṭha tak kan neih theih kan ring," tiin Vanglaini a hrilh a, Chhinga Vengin an ṭhenawm Electric Veng  laka tlawm an duh lo ang.

Electric Veng FC tan kumin kum 25-na a ni a, coach Sanga chuan, "Nikum khan an vanduai a, semfinal an thleng zo lo. Kuminah step khata hma sawnin MPL semifinal kan thlen bakah I Day Football-ah kan champion a, hei hi lawmna tham a tling. Kan thlen chinah kan lawm a, nomawi dang kan duh a nih chuan mipui nen lama kan ṭanrual ṭhat a ṭul," tiin inkhel en turin Electric Veng mipui a sawm.

Football ngaina veng Electric Vengin RG Stadium floodlight thar lawm pahin entu an nei ṭha ngei dawn a, an ṭhenawm Chhinga Veng an tlem bik ring suh. Lammuala 'Chhinga Veng - nuam, nuam, nuam' ti ṭhintu mipui ṭhahnem tak kha RG Stadium-ah an au tawh zawk dawn.

Coach : Electric Veng FC coach Lalsangzuala Hmar hian season hnih chhung Chhinga Veng FC a enkawl a, hetah hian tun ṭuma Chhingcows enkawltu Anand Gurung leh Lalremruata te hi a thachhang dawltu an ni.

Sanga hian kum zawnin MPL nomawi vawi hnih a chawi theih avangin coach ṭha a ni tih chu a chiang. Chutihrualin tualchhung football-a coach thawkrim pahnih Anand leh Remruata te inkawp hi an rintlak a, Electric Veng aiin semifinal ticket an nei hmasa zawk.

Goalkeeper : Lalmuansanga hi season liam ta khan Chhinga Veng second keeper a ni a, kuminah erawh Electric Veng FC rinrawl a ni. Hriat tel atana ṭha chu Mizoramin Santosh Trophy final round an luh theih nan qualifier-ah first keeper a ni. Chhinga Vengin Chanmari lakah Zothanmawia an chan a, amaherawhchu Dharminder Guru an neih tak avangin club dang an awt 

lo ang.

Defender : Sanga'n Electric Vengah MPL best defender nilai PC Laldinpuia leh K. Lalmalsawma a lakluh bakah Rorelliana leh Lalnunmawia te an neih sa avangin an tlarhnung hi an ṭha. Chutihrualin Chhingcows tlarhnung hi an inkhairual mah zawk.

Chhinga Vengin Vanlalzuidika leh Lalthlahlova te an inkawptir thei a, right back-ah Vanlalchhuanga neiin left back-ah Lalmuanawma (C. Muana) an chhawr thei. Tawnhriat ngah C. Muana aiin mi thar Lalremruata hian rin a hlawh zawk thei bawk.

Midfield : Sanga hian midfielder che rang a lawm a, a neih zinga tawnhriat nei ṭha ber erawh ball thiam mah se che muang Jacob Lalrawngbawla a ni daih thung. Captain Jacob-a hi khelhna hmun pek a nih chuan a che chhe ngai lo a, chutihrualin an intawn hnuhnun bera bul ṭantu Lalengmawia, H. Zawnhmingthanga leh Lalruatfela Zote te bawkin bul an ṭan thei tlat.

Chhinga Vengin K. Lalnunzama (Valtea) inhliam vangin an chan a, KC Larchhuakmawia'n a hmunruak a hnawh khat ṭha hle. Ball thiam leh che rang Lalsawmzela'n season ṭha tak a hmang a, Lalmawizuala leh F. Zosangliana te an rintlak ṭhin hle. An intawn hnuhnun berah striker MC Malsawmzuala khelhna hun pek a nih theih nan Ouattara Sie pawh let a ni a, a thlen nawn kher a rinawm loh.

Forward : Tlarhma hi team pahnih hmuhnawmna lai tak a ni. Electric Veng forward Ramhlunchhunga ball khawih hi a hmuhnawm takzet a, awlsam takin amah chuhtute hi a bum mai ṭhin. Tun dinhmuna Electric Veng tlarhma zinga hlauhawm ber erawh Lalrammawia a ni a, Sawleng tlangval hian MPL8-ah goal li khungin match hnuhnung pahnihah goal thum a khung.

EFC hian David Lalchhuanawma an la kawl a, Salem Veng tlangval hian Sanga hnuaiah khelhna hmun a chang tam tawk lo nachungin goal li chu a khung ve tawh tho. Hriat tel tur erawh Dilkawn tlangval Vanlallawmtluanga hi lar hran lo mah se a tih tur chin a tih ṭhin miau avangin coach lawm a hlawh hi a mak lo.

Chhinga Veng pawhin ball thiam Lalchungnunga an kawl a, Zotuitlang rawlthar hi 'Indian Messi' tia hming lem an pek ve hial a ni. Tlarhmaa awm dang Ṭhasiama hi a khelh ṭhat ṭum chuan danglamna thlen thei a ni a, Malsawmdawnga pawhin Zo United-a a khelh lai aiin a puitling tawh tih a lantir.  Goal khung tur hming sawi a ṭul erawh chuan MC Malsawmzuala an kawl a, Siaha tlangval hian goal 11 a khung tawh. Foreign forward Ouattara Sie pawhin goal thum a khung ve tawh bawk.

Intawn hnuhnung ber - November 11, 2019

Electric Veng FC (4-2-1-3) : Lalmuansanga (GK); K. Lalmalsawma, Rorelliana, PC Laldinpuia, Lalnunmawia (Vanlallawma 77'); Lalengmawia, H. Zawnhmingthanga; Lalruatfela Zote (Jacob Lalrawngbawla 27'); Ramhlunchhunga, Lalrammawia, Vanlallawmtluanga (David Lalchhuanawma 60').

Chhinga Veng (4-1-2-3) : Dharminder Guru (GK); Vanlalchhuanga, Lalthlahlova, Vanlalzuidika, Lalmuanawma (Lalremruata 39'); KC Larchhuakmawia; Lalsawmzela (F. Zosangliana 72'), Ouattara Sie (Lalmawizuala 67'); Ṭhasiama, MC Malsawmzuala, Lalchungnunga