Manager thar hnuaiah Juve an chak

Juventus chuan an manager thar Luciano Spalletti enkawlna hnuaia an match hmasa berah Cremonese chu 2-1 in an hneh - Old Lady hian Igor Tudor an ban hnuah match hnih an khel tawh a, an chak ve ve a ni.

Old Lady hian boruak thar hip an ngeih, minute hnihna lekah Filip Kostic hmangin goal an khung a, second half-ah Andrea Cambiaso chuan an goal hnihna a khung, hun tawp dawna Jamie Vardy goal khung chuan Cremonese a chhan zo lo.

Juve manager thar Spalletti chuan, "Hmasawnna tur lai chu kan la ngah hle, a pawimawh zawk erawh chu tun ṭum atana hnehna kan chang hi a ni, player te an in au tamin boruak pawh a fuh chho hle bawk.

"Hun rei lote chhunga danglam hluai theih a ni lo, zawimuangin hmasawn kan tum ang," a ti. Turin club hian kar laihawlah Sporting Lisbon nen Champions League an khel dawn a, kartawpah Torino nen 'Derby della Mole' an khel zui ang.

Inrinni zan Serie A inkhel dangah Napoli leh Como te chu goal awm lo 0-0 in an inhnehtawk. Chak zo lo mah se Antonio Conte chu an khelh danah a lawm. Naples club manager chuan, "Ka naute khan an theihtawp an chhuah, lungawi lohna tur a awm lo.

"Como khan an khel ṭha em em a, khatiang taka football level sang an khel thei kha fak an phu. Keini lam pawhin goal kan khung lo palh a ni mai a, lawmna tur tam tak ka hmu," tiin a sawi.

Napoli hian Ningani zanah Eintracht Frankfurt nen UCL an khel zui leh nghal ang.