A zawna vawi thum nan Atletico chak

Atletico Madrid chuan tun season-a a vawi khat nan league-ah match thum a zawnin hnehna an chang - Inrinni zan khan an mikhual Sevilla chu 3-0 in an sawp a, champion an la tum ve reng tih an pholang.

Mualneitu Atletico hian inkhel ṭantir aṭangin chance duhawm an nei a, mahse, José María Giménez chuan uiawm takin a tauh goal lo a, Julian Alvarez leh Alexander Sorloth ten an hun ṭha neih an chhawr bik lo.

Sevilla tan Ruben Vargas-a'n a hun neih a chhawr bik lo a, Atletico Madrid forward Nico González-a'n post a pet perte leh, Sevilla keeper Odysseas Vlachodimos-a'n a dansakte pawh uiawm a tling.

Goal lut loa chawlhlawk hman a nih hnuah, Alvarez-a'n hun ṭha khawh ral chungin second half a ṭan a, Sevilla tana Djibril Sow leh Isaac Romero te chance neih pawh uiawm a tling.

Minute 64-naah erawh goal kan hmu ta nge nge - Video Assistant Referee rawn a nih hnuah Tanguy Nianzou chu Gimenez lakah a foul ngei tih pawm a ni a, penalty a chawi - Alvarez-a'n goal-ah a chantir.

Thiago Almada chuan minute 77-naah belhchhahin, Antoine Griezmann-a'n minute 90-naah chak nemnghehna goal a khung zui - Diego Simeone-a nauten La Liga champion turin an ṭha tawk tih an pholang.