Match 15 chak zawn thei Bayern Munich

Bayern Munich chuan an duhthusam anga seaon bul an ṭan fuhna chu an chhawm nung zel - Inrinni zan khan Bavarians hian Bayer Leverkusen chu 3-0 a hnehin Bundesliga table chung berah an awm chhunzawm.

Vincent Kompany leh a naute hi tun season chhungin inelna hrang hrangah match 15 an khel tawh a, an chak fai vek. German rama football inelna sang berah hian anmahni hnaih bertu RB Leipzig aiin point ngain an sang zawk.

Allianz Arena-a inkhelah Harry Kane chu hahchawlhna hun pek a ni a, tlarhma laia awm Nicolas Jackson chuan a hna rawn thawhsakin goal a khung, ani bakah hian Serge Gnabry-a'n khungin, Loic Bade chuan anmahni lamah a tilut bawk a ni.

Bayern manager Kompany chuan, "Player ṭhenkhat an luh loh avangin kan khingpuite an phur a ni mai thei, khelmual chhunga lut te kha player dang ṭha tak takte vek tho an ni a, anni khan an hna tlin takin an thawk," a ti.

German club pahnih hian Champions League lam an hawi zui nghal a ngai dawn - Bayern Munich hian Paris Saint Germain an tlawh dawn a, inkhel dangah Luvekusen leh Benfica te an inkhel bawk ang.