Old Trafford-ah Mourinho a kir dawn e

Zanin dar 1:00 hian Manchester United leh Tottenham Hotspur te an inkhel dawn a, Old Trafford-a mipui thlir rawn tur chu Jose Mourinho a ni. Portuguese manager hian hnawl a nih hnuah pawh zah takin a club hlui chungchang a sawi ṭhin a, amaherawhchu chakna tur a nih phawt chuan a ṭul dan anga hma la ṭhin a nih miau avangin thlalatuten a chet dan an veh uluk dawn.

Old Trafford-a Mourinho let leh dan tur hi BBC chuan, "Krismas chawhlui kilnaa sawm loa 'ex' rawn lang hlawl ang," nen an tehkhin a, a awm ang viau. Portuguese manager thlaktu Ole Gunnar Solskjaer hnuaiah United-in hmasawn lam aiin tlakhniam lam an pan a, an manager hlui erawhin Tottenham a zawnin match thum a chakpui. United ṭantuten Mourinho ban hun an nghahhlelh lai theihnghilhin Europa League leh League Cup an champion lai an hre chhuak ang a, manager hlui nen khai khin hnua Solskjaer 'sit' tawk pawh an awm dawn.

Spurs forward Heung-Min Son chuan, "Pa ngilnei leh zaidam a ni a, fiamthu thawhin hlim hmel a pu ṭhin. A nungchang hi ka ngainat zawng a ni a. United-ah kum hnih a awm tawh a, keini duh chu inkhelh zawh hmaa hlim hmel hmuhtir a ni. Kan manager leh kan tan result ṭha neih nei kan duh," tiin Mourinho tana theihtawp an chhuah tur thu a sawi.

Mourinho hian Tottenham manager a nih tirha press conference an neih hmasak ber khan room leng loin tel an dil a, Spurs-in an hnawl ṭhen a ngai hial. Niminah pawh Mourinho thusawiin ngaihven a hlawh a, ṭawngkam hriam hmang lo mah se a ze ngai erawh a chhuah tho.

Spurs manager Mourinho chuan, "United ṭantute hian ka chungah zahna an lantir ngei dawn. Amaherawhchu, kan duh hi an thil duh letling hlawk a ni dawn a, an team ṭan chak an duh laiin kei chuan Tottenham chak kan duh. Min theihnghilh se, an team ṭan tana theihtawp chhuah turin ka duhsak," tiin United ṭantute ti lunghnur si loin London club ṭantute lawmna a sawi.

Mourinho chuan, "Inkhel pawimawh bik khelh hi nuam ka ti a, team ṭha hmachhawn hi ka duh dan a ni. Nuam ti taka ka awmna ṭhin Old Trafford-ah ka let dawn a, United ṭantute nen pawh kan inkar boruak a ṭha," tiin ṭha taka dawnsawn a beisei thu a sawi.

United manager hlui chungchang sawiin Solskjaer pawhin, "Club leh fan-in kalphung nghet ṭha tak an nei a, Mourinho hian lawm a hlawh ang. Kum hnih leh a chanve chhungin nomawi an chawi a, club-in lawm takin an pawm ang," tiin a sawi.

Leicester City    1:00 AM    Watford

Manchester United    1:00 AM    Tottenham Hotspur

Wolverhampton    1:00 AM    West Ham United

Chelsea    1:00 AM    Aston Villa

Southampton    1:00 AM    Norwich City

Liverpool    1:45 AM    Everton

December 5, Ningani zan

Sheffield United    1:00 AM    Newcastle United

Arsenal    1:45 AM    Brighton & Hove