MPL9 khel tur a hriat kim dawn

Vawiin chawhnu dar 1:00 hian Lammualah MPL Playoff second leg khelh a ni dawn a, FC Venghnuai leh Kanan FC an inhmachhawn dawn. First leg-ah Venghnuai hi 2-0 in an chak tawh a, MPL khel zel turin an dinhmun a ṭha.

Rindika Hmar kaihhruai FC Venghnuai hian first leg-ah an star player Vanlalthanga chu round 14-a hnawhchhuah a nih avangin an chhawr thei lo a, second leg-ah an chhawr thei dawn. Hualngohmun tlangval hian MPL8-ah goal ruk a khung thei a, Kanan FC hmabak a harsa sawt ang.

First leg-ah Venghnuai tan JH Lallianzuala leh Laldampuia ten goal an khung a, RG Stadium-ah ball chang tam mah se goal khung an harsat a. Chutihrualin counter attack hmanga innghat Kanan FC hi enliam mai an harsa, first leg-a an goal hnih chhuah hi Venghnuai tih ṭhat aiin an tihsual vang a ni zawk.

Kanan FC coach Chawngthansanga chuan, "Minute 90 dang kan nei a, MPL khelh hi kan la beisei tlat," tiin Vanglaini a hrilh. Chawnga hian Reitlang FC chu MPL khel turin a tlinpui tawh a, Kanan FC hi first division-ah a champion pui bawk avangin an hmabak harsa tak hi thil theih loh erawh a ni lo.

MPL9-ah team pasarih Aizawl FC, Mizoram Police, Chhinga Veng, Electric Veng, Chanmari FC leh Chawnpui FC te an khel dawn a, vawiin hian hmunruak pakhat hi hnawhkhah a ni ang. Kanan FC hi goal hniha an chak thei a nih chuan FC Venghnuai nen an inhnehtawk chiah ang a, penalty shootout hmanga chak zawk zawn tur a ni.