Merseyside derby: Nomawi vs Hna chân!

Zanin dar 1:45-ah Liverpool chuan Premier League match khel turin Everton an mikhual a, club pahnih dinhmun in ang lo tak avangin Merseyside derby hi a hmuhnawm dawn. 

Liverpool-in Premier League table chung ber luahin champion kawng an zawh zel a, eng level-ah pawh Merseyside derby a hniam ngai loh avangin Reds tan an champion kalkawng dal thei a ni. Reds aiin Everton dinhmun a hlauhawm zawk - table-ah 17-na an ni a, relegation zone aṭanga an himna chu point hnih chiah a nih avangin an chak loh chuan an dinhmun a him lo. 

Marco Silva tan he inkhel result hi a pawimawh lehzual. Merseyside derby-ah meuh Liverpoool a hneh a nih chuan a him ang a, an tlawm a nih erawh chuan a tan zau taka kawngka hawnin a awm ang. 

Silva-a'n a hna chan lo tura insiamṭhat a mamawh lai takin Anfield a pan dawn a, Portuguese manager tan, "Ka ṭawngṭai chhanna," tia sawi harsa tak tur chu a ni. 

Everton hian tun season-a league match 14 an khelhah vawi li chiah hnehna an chang a, vawi riat an tlawm a, vawi hnih an khingpui an inhnehtawkpui! Toffees (Everton sawina) hian an league match hnuhnung pahnihah Norwich City leh Leicester City an ngam lo a, October 2010 hnua an la ngam leh loh Liverpool ngam hi a harsa dawn. Mahse, sawi tawh angin Silva tan he inkhel hi 'thih leh dam' inkar a ni a, a thiamna leh theihna zawng zawng a hlan khawm dawn avangin point thum lo chu a mitthla lo ang. 

Silva dinhmun derthawnzia khawthlang media ten an hre vek tawh a, mahse a hma hun chungchang zawhna erawh, "Keimah ni lo, midang zawt rawh u," tiin a lo chhang tawh. 

Kum 42 mi manager hi Everton boss hlui David Moyes chuan a thlak dawn niin an sawi a, mahse hei erawh fan-ten an duh lo hle - Silva tan thawk huaina tham a ni. Silva hi Everton-a share ngah ber Farhad Moshiri-a'n hun pek a la duh avanga la cham rihah ngaih a ni a, British-Iranian sumdawng hausa hian rei tak erawh a dawh thei bik tawh lo ang. 

Portuguese manager hian Leicester lakah hnehna chang lo mah se a vanduai tia sawi theih a ni a, 3-4-3 formation a hman chu a hlawhtlinpui teuh hle - he formation tho hi a hman leh a rinawm. 

December-a Liverpool fixtures hautak bawk hi sawi nawn a ngai leh ṭhin a, tun hnai ni 11 chhungin match pali an nei dawn. Jurgen Klopp tan thiam taka player remkhawm a ngai dawn tihna a ni. 

Fabinho inhliam vangin an league match hnuhnung berah Jordan Henderson chu Brazilian midfielder 'role' ah dah a ni a, Naby Keita leh Xherdan Shaqiri an dam leh tak avangin Klopp-a'n duhthlan tur a neih belh. Adam Lallana, Georginio Wijnaldum leh Alex Oxlade-Chamberlain te chu midfield-ah tawlh hnung hret chunga lo khel tawh vek an ni a, Klopp-a'n a duh phawt chuan an pathum zinga pakhat hi Fabinho khelhnaah a dah thei. 

Duhna hmun apianga chhawr theih James Milner a la awm bawk a, fixtures hautak thlirin Mohamed Salah, Roberto Firmino leh Sadio Mane te a inkawp tir ang em, tih chu zawhna awm a ni bawk - hrem vanga inlan lo tur Alisson aiah Adrian chuan si ban a nghak ang. 

Nimin khan FA Cup third round fixtures tihchhuah a ni a, Liverpool hian zanina an hmachhawn tur Everton bawk an hmachhawn dawn - club pahnihin Cup inelnaa hma taka intum hi an duh lo ve ve ang. Champion lai Manchester City-in League Two club Port Vale an mikhual dawn avangin an hmabak a awlsam tia sawi theih a ni a, Wolves khelmuala leng tur  Manchester United tan fixtures a duhawm bik lo. 

Arsenal leh Leeds United inkhel tur chu en châkawm zinga chhal ngam a ni a, Tottenham Hotspur-in Middlesbrough an lenchilh dawn thung. Chelsea-in Stamford Bridge-ah Nottingham Forest an mikhual dawn a, tun dinhmuna non-league club tel awmchhun AFC Fylde chuan Premier League club Sheffield United an hmachhawn dawn a, non-league club dang Boston, Hartlepool leh Eastleigh ten third round lut turin replay match khelh an la mamawh.