Mipui thinlung hnehtu Jemimah chu

Jemimah Rodrigues hian chanchin ngaihnawm a nei tawh ṭhin a, mah se khawvel deng chhuak dawt tur chuan khawvel huap thil lian thama theihna lantir ve a ngai. World Cup semifinal-ah Jemimah-i'n a hun ṭha a bawhpelh lo a, team ṭha bik Australia target siam 338 runs an phak theih nan thi loin 127 runs a siam a, India final a thlenpui.

Women in Blue captain Harmanpreet-i'n champion tur chuan thil danglam thlen a ngai, a ti a, thil danglam titu chu Jemimah hi a ni. Australia laka hnehna hlu bik India a chanpui zawhah Jemimah chuan, "A hmasa berah chuan Isua Krista hnenah lawmthu ka sawi, hetiang thil hi chu keimah maia tih theih a ni lo, ama min hruaina vang chauh a ni zawk.

"Exodus 14:14-a, 'LALPAN a dosak ang che u, nangni chu in awm hle hle mai ang,' tih thu ang khan a ni. Ka rilru leh taksa a chau a, kei chu khelmual chhungah khan dingin Ani chuan min beihsak," tiin a sawi a, a chanchinin a lo zir ve zel bawk nen mipui a hneh hle.

Kum 25 mi Jemimah hian social media a hmang thiam a; a rinna bakah a tui zawng leh music lama a tuina thlengin a lanchhuahtir nasa. Nikum khan Jemimah pa Ivan Rodrigues chu dik lo taka Khar Gymkhana club-ah rinna lam thil buatsaih a puh a ni a, hei vang hian Jemimah membership pawh hlihsak a ni. Khar Gymkhana hi Mumbai-a innghat a ni a, cricket leh social club niin cricket ground, swimming pool, gymnasium, health club leh thil dang ṭhahnem tak a awm.

Jemimah hian hlawhtlinna chang turin harsatna a paltlang a; 2022 World Cup-ah telh a ni lo. Kuminah World Cup-ah pawh inelna ṭantirh lamah a che ṭha lo a, a bat hun thlengin sawn sak a ni a, England an hmachhawn ṭumah phei chuan a khel pha lo. Sawiselna a tawh nasat avangin amah ngei pawhin a ṭan nasat thu a sawi hial a, mah se World Cup a tawp meuh chuan Pathian ringtu leh chawimawtu Jemimah chu India chauh ni loin khawvel cricket ngainatute 'darling' a ni ta hial.