I League club Aizawl FC: Duhthusama bul ṭan, lungngaihna mittui a tawp

GIG Motors MPL12-ah champion ngun ber Aizawl FC-in duhthusama ṭhain bul an ṭan a, final hma zawngin hneh loh an tawng lo a, league round-a point hmu hnem ber leh chak tam ber record an siam. Coach R. Lalruatfela hote hian bul ṭan ṭha mah se a pawimawh ber nomawi an chawi ta lo a, lungngaihna mittui nen MPL12 an khar.

Team thar Aizawl FC

Aizawl FC-in tualchhung football an hrechiang a, champion dan thuruk pawh an hria. Mahse, sum lama harsatna an tawh avangin tun hmaa an tih ṭhin anga player ṭha rual la khawm loin an academy player chungah rinnna an nghat ngam.

I League club hian season liam taa hneh loh nei loa champion puitu player ṭhahnem tak an chân. MPL11 final-a Mizoram Police an hneh ṭuma bul ṭan player an la kawl chu keeper Vanlalhriatpuia, left back H. Lalrempuia, midfielder H. Lalruatfela leh Lalawmpuia Sailo bakah striker C. Lalhriatpuia te an ni. Farkawn tlangval C. Hriata hi hliam vangin tun season-ah an chhawr mumal lo a, final-ah pawh an hmang thei lo.

An player chân langsarte chu tlarhmaah Lalrinzuala, Lalbiakdika leh Augustine Lalrochana te an ni a, midfield-ah best midifielder-a thlan Lalthankhuma a awm tawh lo a, tlarhnungah tawnhriat nei ṭha pahnih Lalchhawnkima, S. Lalhrezuala leh Lalruatthara te an awm tawh lo.

Chutihrualin Aizawl FC hian an player hlui Rohmingthanga an la let a, Santosh Trophy-a Delhi rinrawl ni thei Rotea hi tawnhriat ṭha tak nen a rawn kir. Midfield-ah K. Hriata leh hmabak nei êng Eric Remruatpuia Chhangte te an la lut a, mual sir aṭanga nawr nan Vincent Lalduhawma te an la lut bawk. An player lakluhte hian hmun pawimawh an chang vek.

Aizawl FC-in fak an phuna tak erawh an mamawh an hria a, an academy player-ten hmun pawimawh an chang. Right back-ah Laldawngzuala'n hmun pawimawh a chang a, season chawhnu lamah Freddy Lalruatkima a rawn che ṭha leh em em bawk. Defence laiah Rotea dinpui Lawngtlai tlangval T. Lalmuanawma a rintlak a, mah se Mamuana hi round 10-a a inhliam avangin a inlan zui lo.

Mahse, centre back-ah hian academy chhuak C. Zomuanpuia a la rintlak a, Kawnpui tlangval Muantea bakah Tlangmawi tlangval RH Laltlanhlua pawh academy chhuak tho a ni. Midfield-ah Cherhlun tlangval Isak Lalvenhima'n season bul a ṭan ṭha a, tlarhmaah C. Hriata inhliam mah se Zomuansanga'n a hmun ruak a hnawhkhat ṭha. Khawbel tlangval Zomuana hi MPL12-a hming chher ber ang hiala chhal ngam a ni.

Invincibles II?

MPL11-ah Victor Lalbiakmawia hoin Aizawl FC-in hneh loh an tawng lo a, he record duhawm tak hi coach R. Lalruatfela hoten an chhawm nung zel. R-a hnuaiah Aizawl FC-in khelh dan nghet ṭha tak an nei a, possession football an khelh bakah an goal bawh a na em em bawk.

Goalkeeper Vanlalhriatpuia'n captain hna rawn chelhin inhliam vanga inlan loh ṭum nei bawk mah se tlarhnungah a rintlak. Defence laiah Rotea'n ro a rel a, Mission Veng tlangval hian team a ho ṭha a, Aizawl FC attack hi tlarhnung aṭangin an inṭan a, wing back an hman tel bawk avangin club dangin dan harsa an ti hle.

Position tinin hna an nei vek a; season tir lamah Isak-a'n no. 6 hna chelhin a thawhrimna leh taimakna avangin OmOma ten zalen takin an khelh theih phah. Season chawhnu lamah Eric-a'n no. 6 hna rawn chelhin, defence aṭanga ball rawn la chhuaktu a ni leh a, K. Hriata'n team rawn zawmin, OmOma nena an inkawp rem hnuah phei chuan midfield nghet ṭha ber an ni.

Tlarhma lam Zomuana'n season ṭha bik a hmang a, goal 18 zet khungin goal khung tam ber record a khum chiang. Khawbel goal machine hi goal khung aṭanga teh ringawt tur a la ni lo, midfield a thlawp ṭha a, Aizawl FC game timawitu ber a ni. Mual sira awm Vincent Lalduhawma, Sawma Tlangte leh Laltlanzova ten goal an khung ve reng bawk a, R-a hote hian MPL12-ah goal 44 tehmeuh an khung.

League round-ah Aizawl FC hian vawi 12 chakin vawi hnih an khingpui an inhnehtawkpui a, point 38 an hmu a, chak tam ber leh point hmu tam ber record an siam. Aizawl FC-in League Winner nomawi an chawi a, semifinal-ah Dinthar FC 4-1 a hneh lehin, hneh loh an tawng lo zel a, Victor-a hoa invincible team an din hnuah R-a hoin invincible team din thei dinhmunah an ding.

A tawpna mittui

Aizawl FC-in MPL bikah match 33 chhung hneh loh an tawng lo a, an record hi a ropui hle. Final khelh hma pawhin an inringtawk a, mahse an duh dan vekin thil a thleng lo. Dinthar nen semifinal second leg an khelh ṭumin floodlight chawmtu generator a chhia a, second half khelh hun sawn a ṭul phah. An khingpui Chanmari FC-in ni thum chhung final atana inpuahchahna hun an neih laiin Aizawl FC erawhin ni hnih chauh an nei thung.

Final-ah ṭum dang zawng aiin entu an ṭhahnem a, boruak sangah Aizawl FC squad chhah tawk lohna a lang. Chanmari FC-in an lakchhuah tluk zeta ṭha player an luhtir theih zel laiin Aizawl FC erawhin bench aṭanga lut tur player an nei hraw tawk lo a, inkhel boruak a sang nen coach tan hna a harsa lehzual.

Inkhel pawimawh bikah danglamna siamtu chu penalty a ni a, Aizawl FC a vanduai zawkah an ṭang. Chanmari lamin penalty an hmuh laiin Aizawl FC lam erawhin penalty ni tura an ngaihah an hmu ve lo a, referee lahin ṭan chhan ṭha tak a nei miau si. An chungah football a nunrawnna a lang a, Mizoram chhunga football nomawi hlu ber Mizoram Premier League an chawi thei ta lo.

Aizawl FC hian tih takzeta football an khelh avangin an mittui a tla fo a, I Day Football 2024 final-ah champion turin inring mah se Mizoram Police an hneh lo. Hemi ṭum hian Aizawl FC hian an la na hle. Mahse, MPL12 final-a Chanmari FC an hneh loh ṭum hian an la tuar na zawk a, coach R-a pawhin chibai tur angte a chibai hnuah dressing room a pan nghal - coaching staff dang leh player-te an insum zo lo. Football nunrawnna tem pha tawh chuan an tawrhna hi an hrethiam ang.

AFC coach kam chhuak

Penalty chungchang
Penalty kha pek theih leh pek loh theih niin ka hria a, a pe pawh kha a awm viau ka tia. Chutihrualin minute 93-naa K. Hriata kha penalty ve ngei turah ka ngai. Contact a awm chiang a, dive-ah a ngai nih chuan card a pe tur a nia, a nih loh chuan penalty kan hmu ve ngei ngei turah keichuan ka ngai a ni.

Red card chungchang
Kanan FC nen round 5-a kan khelh khan minute 60-naah Zomuana la chhuakin C. Hriata kan luhtir. Zomuana'n a chhuah dawnah shinguard a phelh a, final-a referee Bawla tho kha referee niin yellow card a pe. Minute 73-naa Christo an thlak khan ani pawn shinguard a phelh a, yellow card a pe leh si lo lai kha a awmzia ka hre lo. (Christo khan minute 26-naah yellow card a hmu tawh a, yellow card vawi hnihna hmu se chuan red card pek theih tur a ni.)

Final inbuatsaihna
Semifinal zawha ni hnih chiah gap kan nei bik kha kan tuarin ka hria a, coach-te pawh duhthusâmin kan inbuatsaih ṭha hman lo a, video session tur pawhin duhthusamin kan inpeih lo. Final boruak sanga referee decision mawhpuh theihin a awm hi a pawi ka ti takzet a, kan chak loh dan pawm thiam a har ka ti khawp mai a, tun season Chanmari FC nen a kan inkhelh apiang deuh thawa referee tihsual lian tham a awm hi a pawi ka ti takzet a ni. Chutihrual chuan thinlung takin Chanmari FC te ka lawmpui e.

- R. Lalruatfela, AFC coach