Bournemouth tan Erling Haaland a sang lua e!

Goal a khung lo ve zauh a, a inlan lehna hmasa berah Erling Haaland chuan goal hnih a khung zui leh nghal - Pathianni zan Premier League inkhelah Manchester City chuan Bournemouth chu 3-1 in an hneh.

Etihad Stadium-a inkhelah hian Haaland bakah Nico O'Reilly chuan goal khat dang a khung, mikhual team tana Tyler Adams-a goal khungin awmzia a nei phak lo; Pep Guardiola naute hi Arsenal hnuaiah an inhlangkai leh ta a ni.

Haaland

Player ṭha danglamna kan hmu, a hmuhnawm tel bawk. Bournemouth lamin goal an nawr ngam avangin an defender ho an tawlh hma, khelmual chanve bawrah an awmkhawm, thlamuang taka an din lai hi inven ngaihzual hun tih an theihnghilh zauh.

Man City lamin ball an chang thut a, winger Rayan Cherki chuan mual laia Haaland awm chu hmu fuhin, a um tur tawk chiahin a tauh phei a, striker ṭha Haaland hian chak zeta tlan luh puiin an goal khatna a khung.

Guardiola naute lawm chhung erawh a rei lem lo, mikhual lamin Adams hmangin an sut, corner aṭanga ball kal chu keeper Gianluigi Donnarumma chuan a lo nem chhuak ṭha tawk lo a, ball tla hi Adams chuan a lo pet lut.

Chawlhlawk hmain Haaland bawk kan hmu - Cherki-a ball pek bawk um lutin a khung a, second half-ah O'Reilly chuan an chak a nemnghet bawk. Andoni Iraola nauten inkhel hmuhnawm lantir mah se a tawpah chuan City an chungnung.

Pep a lungawi

Pep Guardiola chu a naute khelh danah a lawm a, a bik takin striker Erling Haaland chu mamawh chhanna a nih thu sawiin, a theihna sang tak chu a la tihpun belh zel tih a sawi bawk.

Kum 54 mi Guardiola chuan, "A nihna tak sawi chuan Erling Haaland tel lo chuan thil hi a harsa, a awm erawh chuan kawng hi a awlsam leh mai ṭhin. Enkawl a nuam a, ka duh khawp lohna lai ka sawi te ngun taka ngaithlain a rawn siamṭha mai ṭhin," a ti.

Spanish manager chuan sawi zawmin, "Match 28 khelh tur zinga 10 chauh kan la khel a, kawng zawh tur a la thui hle. Engtik niah emaw chuan Arsenal pawhin goal an la chhuah ve ngei ang," a ti a, champion tuma an elpui Arsenal a chhaih nghal.

Premier League matchn 10 an khelh aṭangin Man City hian point 19 an hmu a, pahnihna dinhmun luah mekin an chungah Arsenal chauh an awm - Gunners an phak lohna hi point ruk a ni mek, an inkar hi zau tak chu a la ni hran lo.