Paris Masters champion Sinner a lawn sang

Jannik Sinner chuan Felix Auger-Aliassime hnehin a vawi khat nan Paris Masters title a la, a champion avang hian tun kara mipa tennis world ranking chhuak tharah chuan number 1 dinhmun a luah ang.

Pathianni zana final inkhelah, rinkai zawk a nih ang ngeiin Sinner hian Canadian tlangval Auger-Aliassime hi 6-4, 7-6 (7-4) in a hneh a, indoor hard court bikah a zawnin match 26 tehmeuh hnehna a chang tling ta chiah bawk.

Kum 24 mi Sinner tan nomawi a ni satliah lo, tun inelna an neih zawh takah hian Carlos Alcaraz a thleng sang ve lo a, hei vang hian Sinner hian ranking point lamah point 250-in a tlan pel thei ta a ni.

November 9 aṭangin ATP Finals an khel dawn, ranking sang zual pariat inelna an khelh hunah chuan Sinner hi number 1 ni chungin a inlan thei dawn tihna a ni a, hun rei tak hnuah Alcaraz chu number 2 a ni ve leh thung ang.

World number 1 thar Sinner chuan, "Paris Masters kan khelh ṭan dawn aṭang khan number 1 nih theihna kawng a inhawng tih ka hria a, mahse thawk leh khata tih hluai theih a ni lo, ni khat te te in hma ka sawn a ni.

"Tunah hian ranking hi ka kutah a awm tihna a ni lem lo, ka chetsual zeuh chuan min tlanpel leh nghal mai dawn tih ka hria. Chutihrual erawh chuan tun kara ka khelh dan leh number 1 ka nih leh theih avangin ka lawm hle a ni," a ti.

Sinner leh Alcaraz te hi tunlai player ṭha berte an ni a, season hmasa leh kuminah pawh Grand Slam pali chu an insem zo vek; nomawi chauh ni loin ranking point lamah pawh an inel chhunzawm zel a, tennis hmuhnawm an chawp chhuak zel ang.