Barcelona-in Real an um zel

Spanish La Liga-ah club ropui pahnih, Real Madrid leh Barcelona an in um chhunzawm zel a, Real chak thu hre saa inlan Barcelona chuan 3-1 in Elche an hneh.

Catalan club tan khelmual pawn lama chanchin ngah tak Lamine Yamal chuan khelmual chhungah chanchin lawmawm a nei ve leh ta, Barcelona tan goal hmahruai a khung.

Yamal bakah Ferran Torres leh Marcus Rashford ten goal khat ve ve an khung bawk a, Elche tana Rafa Mir goal khung chu mualpho zualpui khuhna chauh a ni - Catalan club-in 3-1 in hnehna an chang.

Barcelona-in hnehna an chan avangin table-ah pahnihna an ni leh ta a, hmahruaitu Real Madrid an phak lohna chu point nga a ni - La Liga a ngaihnawm chho zel e.

Hello Yamal

Kum 18 mi lek ni chunga khawvela footballer ṭha ber pawl a nih avangin Lamine Yamal-a'n ngaihven a hlawh a, tun hnaia ngaihven a hlawh chhan tak erawh khelmual pawn lam thil a ni thung.

Yamal hi Argentine rapper Nicki Nicole nen an inkawp avangin thawm a nei reng a, El Clasico-a Real nen an inkhelh hmaa a ṭawngkam ngeiawm tak avangin Real player leh fan te huat rawn a hlawh bawk.

Spanish forward hi a kum a la naupang bawk si a, rei a daih lo mai ang, tih hlauthawngtu an tam hle - Pathianni zanah erawh Yamal-a'n a thiam a la theihnghilh lo tih a pholang a, goal hmangin amah sawiseltute a ngawihtir.

Yamal hian minute kuana lekah Alejandro Balde-a siamsak chu mawi zetin goal-ah a chantir a, tun season inelna hrang hrangah goal li a khungna chiah a ni - assist vawi nga a nei tel a, match kua chiah a la khel.

A tawpah Rashford

Yamal-a goal khung hnuah Barca-in inkhel an thunun a, minute 11-naah Ferran Torres chuan Fermin Lopez-a siamsak aṭangin an goal hnihna a khung zui - Barca an chak dawn, tiin a sawi ngam.

Mahse, thlamuang taka Catalan club ṭantute awm tur chu Rafa Mir-a'n hrethiam loin, Barca offside trap a ṭhiah hnuah si phurh a rawn sut ṭhen a, 2-1 a chawlhlawk hman a nih avangin Barcelona dinhmun a la him bik lo tiin a sawi theih.

Second half ṭantirah Rashford-a'n goal a khung belhah inngai mah se, offside vangin pawmsak a ni lo. Mahse, English forward hi dan reng theih a ni lo a, minute 61-naah Fermin Lopez-a siamsak chu an goal thumna ni turin ṭha takin a khung.

Elche tan Rafa Mir-a'n second half-ah post vawi hnih ngawt pet per mah se Barca an him a, 3-1 in an chak. Kum 28 mi Rashford pawhin Barca nuam a tih chhunzawm zel a, Hansi Flick-a team tan inelna hrang hrangah match 14 a khelh aṭangin goal ruk a khungna chiah a ni a, assist vawi sarih a nei tel.