Roma hnehtu AC Milan

AC Milan chuan Serie A champion nih an tum ngam tih a takin an lantir leh ta - Max Allegri naute hian an mikhualna ramah AS Roma chu 1-0 in an hneh a, goal awmchhun hi Strahinja Pavlovic khung a ni.

Pathianni zan Serie A inkhel dangah Inter Milan chuan Hellas Verona chu 2-1 in an hneh ve bawk a, Italian football inelna sang berah champion tumna inumna thawm a na chho dawn hle.

Milan an chak

San Siro-a inkhelah team pahnih an inbei tawk hle a, chawlhlawk hma hretin Rafael Leao chuan mual sir lamah chak takin ball a luh pui a, amah vengtute a paltlang hnuah box laia awm Strahinja Pavlovic tan a siamsak.

Milan hian goal khung belh theihna remchang an hmu, mahse Christopher Nkunku chuan hnai tak aṭangin goal zawnah a pet loh bakah, goalkeeper Mile Svilar nen chauh an inhmachhawn hnuah pawh goal a khung lo.

AC Milan manager Allegri chuan, "A tir lam minute 35 chhung kha chu Roma kha an khel ṭha hle a, goal khung theihna remchang pawh an insiamsak nual. Mahse, kan tlarhnung lam an ding khawng ṭha takzet.

"A tawp thlengin Roma kha an tlawm duh lo a, minute khat lek pawh kan inthlahdah thei lo. Duhthusam ang thlap chuan khel lo mah ila, kan khelh danah khan a lungawi thlak thawkhat hle a ni," tiin a sawi.

Inter tan point thum

Goal mawi leh danglam bik khan hmu - Inter Milan midfielder Piotr Zielinski chuan Hakan Calhanoglu-a corner pet chu boruaka ball a awm lain a lo pet lut a, ball pet chhuaktu leh a lo pet chhawngtu ten a bu ang thlapin an ti.

Chawlhlawk hma hretin Hellas Verona lamin Giovane hmangin an sut a, hun tawp dawnah Martin Frese chuan anmahni lamah ti lut palhin Inter Milan an chak phah a, khualmualah point thum hlu tak an hlawh chhuak.

Goal mawi bik khungtu Zielinski chuan, "Goal luh dan kha chu training laia kan zir angin kan ti, vanneih thlak takin kan hlawhtling. Tun hnai chu ni thum danah kan inkhelh zel a ngai a, taksa leh rilru chau tak kara kan chak kha a lawmawm," a ti.

Inter Milan hian Serie A match 10 an khelh aṭangin point 21 an hmu a, an hnuaia awm AC Milan leh AS Roma te nen an point an inzar; hmahruaitu Napoli erawhin point 22 an hmu thung, inkhel pakhat lekah an dinhmun an inthlak kual thei.