Number 1 Sabalenka a chak

WTA Finals khelh mekah player ṭha pahnih Aryna Sabalenka leh Coco Gauff te bul ṭan dan a inang lo hle - Sabalenka hi awlsam taka a chak laiin Gauff erawh a service ṭha lo vangin a buai hle thung.

US Open champion Sabalenka hian vawi 11 ngawt aces siam chungin Jasmine Paolini chu 6-3, 6-1 in a hneh a, a service ṭha chu a chakna hnar pawimawh leh langsar tak a ni.

Belarusian star Sabalenka hian number 1 ni chunga season khar turin a dinhmun a sawhnghet tawh a, a service hmasa 66% lai ti dikin Paolini lakah hian ṭum 24 teh meuh winners a vaw chhuak bawk.

Riyadh, Saudi Arabia-a inelna neih laiah hian, inkhel dangah French Open champion Gauff erawhin Jessica Pegula lakaha vawi 17 lai mai double fault a nei a, amah tihsual vanga a khingpui in point a hmuh pawh vawi 75 a tling.

American star Gauff a khel ṭha lo takzet a, world number 3 niin ranking sang zawk ni mah se 6-3, 6-7 (4-7), 6-2 in a chak lo zawkah a ṭang. Pathianni zan khan Steffi Graf Group te hian inelna atana an match hmasa ber an khel zo chiah a ni.

Serena Williams Group-ah Iga Swiatek leh Elena Rybakina te chuan an khingpui ve ve hnehin bul an lo ṭan fuh tawh bawk.