Messi lal ram a zau zel

"A ramin kin ni a nei lo ang," tih ang maiin Lionel Messi ropuina a zual zel a, Thawhṭanni zan khan Barcelona forward hi khawvela footballer ṭha berah puan a ni leh ta. 

Football khawvela mimal chawimawina ngaihhlut hlawh ber tih ngam Ballon d'Or chu semchhuah a ni leh ta a, Messi-a'n Virgil van Dijk leh Cristiano Ronaldo khumin a dawng. Liverpool defender Van Dijk hi pahnihna a ni a, award semnaa kal lo Cristiano Ronaldo chu pathumna a ni - Juventus forward hian Milan khawpuia Serie A award semna a chhim zawk a, Serie A Player of the Year-ah thlan a ni. 

Cristiano Ronaldo hian Messi nen vawi nga ve ve Ballon d'Or dawng tawhin record an inchelh ṭawm a, tunah erawh Messi chu Ballon d'Or dawng ngun ber a ni ta zawk. 

Ballon d'Or chawimawina Messi-a'n a dawn rualin season hmasa a sulhnuah zawhna a awm nghal a, chawimawina dawn a phu tih hai rual a ni lo. Champions League semifinal-ah Liverpool lakah mualpho mah se Barcelona tan La Liga nomawi a chawi a, team anga a hlawhtlin ber kum ni lo mah se mimal anga a sulhnu erawh a ropui hle. 

Barca tan 2018-19 season-ah khan inelna hrang hrangah match 50 khelin goal 51 a khung a, assist vawi 19 a nei a, European golden boot a dawng a, Champions League leh La Liga top scorer a ni a, FIFA Best Player-ah thlan a ni bawk!

Messi-a'n he chawimawina a dawn leh tak avang hian kum 11 liam ta chhung khan La Liga player hlirin he chawimawina hi an dawng tihna a ni a, nikuma he chawimawina dawngtu Luka Modric chuan Messi hnenah Ballon d'Or hi a hlan. 

Ballon d'Or chawimawina dawng thei turin player hming 30 chhawpchhuah a ni a, chung zingah chuan Liverpool-in player an thawh hnem ber - pasarih an lang. Pahnihna VVD chu a thleng sang ber a ni a, palinaah Sadio Mane a awm. Alisson chu top 10-ah lang phakin pasarihna a ni a, Mohamed Salah chu pangana a ni. 

Roberto Firmino, Trent Alexander-Arnold leh Georginio Wijnaldum te an lang bawk. Premier League champion Manchester City-in player panga an thawh a, Raheem Sterling, Riyad Mahrez, Kevin de Bruyne, Bernardo Silva leh Sergio Aguero hming a lang. Player 30 chhawpchhuah zingah Joao Felix, Marquinhos leh Donny van de Beek te chuan point an hmu ve lo.

Lionel Messi-a'n 686 points a hmu a, amah hnaih bertu VVD-a'n a thlauhna hi point sarih lek a ni - point 679 a hmu. Ronaldo a hniam deuh a, Portugal captain hian point 476 bak a hmu lo. 

Ballon d'Or hi France Football magazine chuan kum 1956 aṭang khan an sem ṭan a, kum 2010-2015 inkar kha FIFA nen thawkdunin FIFA Ballon d'Or tiin an sem. Player 30 hi France Football editorial staff-ten an thlang chhuak a, chawimawina dawng tur erawh ram tina ram khat aiawh journalist-ten an thlang chhuak a ni. 

Ballon d'Or hi kum 1995 thleng kha chuan European player bik tan chauha tih a ni. Hemi kum vek hian European club-a khel tan tih a ni leh a, 2007 hnuah khawvel pumpui tan tih a ni ta thung. 

Liverpool goalkeeper Alisson-a'n season hmasaa goalkeeper chawimawina dawn theih zawng zawng chu a dawng - Champions League Goalkeeper of the Season, Best FIFA Goalkeeper, Copa America Golden Glove leh Premier League Golden Glove te a dawng. 

Thawhṭanni zanah a vawi khat nan goalkeeper ṭha thlanna Yashin Trophy semchhuah a ni a, a dawngtu chu tu dang ni loin Alisson bawk a ni. Brazilian goalkeeper hian Barcelona si ban nghaktu Marc-Andre ter Stegen leh Manchester City keeper Ederson a khum. 

Ballon d'Or chawimawina lo dawng tawhtena an thlan, kum 21 hnuai lam player ṭha ber chawimawina Kopa Trophy chu Matthijs de Ligt hnenah pek a ni a, Juventus defender hian Jadon Sancho leh Joao Felix a khum.  De Ligt-a chawimawina dawn chhan erawh Juventus a ni lo a, season hman zawh taka Ajax tana a chet ṭhat vang a ni - Champions League semifinal an lut a, league leh Dutch Cup an champion bawk. 

Hmeichhe thiam ber Rapinoe 

Paris khawpuia Ballon d'Or chawimawina sem zanah hmeichhe footballer ṭha thlanna Ballon d'Or semchhuah ve bawk a ni a, USA winger Megan Rapinoe chuan a dawng.

Kum 34 mi Rapinoe hian kumin World Cup-ah USA chu champion nomawi a chawipui a, joint top scorer dinhmun luahin an ram tan goal ruk ngawt a khung. UEFA Women's Player of the Year ni lai Lucy Bronze chu pahnihna a ni a, French club Lyon defender hnuaiah hian Rapinoe nena US tana khel dun Alex Morgan a awm. 

Rapinoe chuan, "Awih a harsa zawk a, ka tan chuan kum duhawm tak a ni. Ka khelhpuite leh US federation chungah lawmthu ka sawi a ni," tiin video kaltlangin a sawi a, award semnaah hian a kal lo.