Rodgers-a'n Arsenal lam a hawi lo

Leicester City manager Brendan Rodgers chuan a club chhuahsan tumna a neih loh thu a sawi a, tun hnaia an sawi zawm Arsenal lam a hawi rih lo a nih hmel hle.

Kum 46 mi Rodgers hian Foxes chu Premier League-ah chak takin hmalam a panpui mek, league match 14 khelh tawhah pahnihna nihpuiin hmahruaitu Liverpool an phak lohna chu point riat chauh a ni.

Northern Ireland manager hi a contract neih laiah a duh chuan a chhuah theihna dan a awm, mahse Unai Emery hmun ruak luah thei tura an ngaih hian tun dinhmunah chuan anmahni aia point 13 ngawta hniam Gunners lam a hawi lo.

Liverpool leh Celtic pawh enkawl tawhtu Rodgers chuan, "Eng vangin nge tunah tak Leicester City chhuahsan ka duh ngawt ang, he hmunah hian ka hlim a, hmun dang ngaihtuah a ngai rih lo e," a ti. Arsenal chuan thla 18 an rawih hnuah manager Emery an ban a, Spanish manager thak thei tur zingah Rodgers hming hi a ri ring pawl a ni. Mahse, Rodgers chuan, "Kum 2022 thleng daih contract ka nei, manager ṭhenkhat chuan an hna an chan ngei a, kei chu min chhuahtir tumna an la nei rih lo.

"Player ṭha leh inpe tak tak ka thawhpui mek a, kei chuan manager ka nih vangin an tih tur ka lo ruahman mai ṭhin. Chiang taka ka sawi nawn duh chu he hmunah hian ka hlim a, he hna hi thawh chhunzawm zel ka duh," a ti.

EPL table pahnihna luahtu Foxes hian zanin dar 1:00 hian Watford an mikhual dawn a, manager nghet nei loa awm mek Gunners hian Ningani zanlaiah Brighton an mikhual ve thung ang.