ATP Finals khel tur Djokovic

Novak Djokovic hi tun hnaiah chawlhkar thum chhung inkhel loin a awm mek. ATP Finals 2025 a khelh loh mai rinna pawh a lian hman, mahse Italian Tennis Federation president Angelo Binaghi chuan Djokovic hi a tel thei dawn tih a sawi chiang.

Shanghai Masters 1000-ah khan Djokovic hi a inlan a, semifinal-ah Valentin Vacherot hneh loin a tla, a hnu lamah a la inkhel leh rih lo; kar hmasa a khelh zawh tak Paris Masters aṭang pawhin a inhnukdawk a ni.

Angelo Binaghi chuan, "Turin khawpuiah Novak Djokovic a inlan dawn tih kan sawi chiang thei ta. Tennis ngaina tute tan chuan chanchin lawmawm tak a ni ang," tiin a sawi a, inkhel entute tan en man hla tak a nih a rin thu a sawi bawk.

Djokovic hi kum 38 mi a ni tawh, a vanglai a pel tawh - tournament a khel tam thei tawh lo. Tun season chhungin Grand Slam pali a la khel kim a, semifinal chu a lut vek, mahse nikum ang bawkin a champion lo thung.

Mipa tennis ranking sang zual pariat inelna hi November 9-16 chhungin Turin, Italy-ah khelh a ni dawn. Carlos Alcaraz, Jannik Sinner, Alexander Zverev, Novak Djokovic, Ben Shelton, Taylor Fritz leh Alex de Minaur te an tling chiang tawh, hmun ruak hnawh khah tur pakhat a la awm a ni.