Match zawng zawng a pawimawh - Enzo

Chelsea chuan zanin dar 11:15 hian Champions League match khel turin Qarabag FK an lenchilh dawn a, Blues tan fixture awlsam tura ngaih ni mah se, midfielder Enzo Fernandez chuan eng game pawh a pawimawh thu sawiin, inthlahdah thei an nih loh thu a sawi.

Enzo chuan, "Inkhel turin kan inpeih tawh e. Champions League khelh hi nuam kan ti a, he inelna khel phak tur hian season hmasa khan kan thawkrim hle a ni," a ti.

Argentine midfielder chuan sawi zawmin, "Khelh kan châk em em UCL kan khel phak ta a, inthlahdah thei kan ni lo. Match zawng zawng hi a pawimawh vek a ni," a ti a, Qarabag lakah chak ngei tura ngaih ni mah se, tih mai mai an tum lo.

Chelsea hian Inrinni zan khan league match-ah Tottenham Hotspur chu 1-0 in an hneh a, Spurs nena an inkhelh chauh zawhah zin leh nghal a ngai - an vanneihna erawh club langsar an tum lo tur hi a ni.

Hei mai a ni lo. Blues hian kartawp Premier League inkhelah pawh zin hah ngai loin Stamford Bridge-ah match an nei zui dawn a, an mikhual tur hi Premier League mawngphah luah mektu Wolverhampton Wanderers a ni.

Hetihrual hian Blues hian fimkhur erawh an mamawh - tun season-ah tluk leh din an fawm tih loh rual a ni lo a, league match 10 an khelh tawhah vawi nga chiah la chakin, vawi hnih draw an nei a, vawi thum an tlawm tawh thung.

Champions League bikah match thum khel tawhin, an match hmasa berah Bayern Munich chu 3-1 in an ngam lo a, a hnuah Benfica (1-0) leh Ajax (5-1) an hneh thung - Barcelona leh Napoli an la hmachhawn dawn avangin team tenau zawk laka hnehna lo chan hi a pawimawh dawn.

Qarabag lakah Enzo Maresca-a'n a neih ṭhat ber a thawhchhuahpui ang em, tih chu zawhna awm a ni a, Blues player zingah Enzo, Moises Caicedo leh Reece James te an pawimawh ṭhin a, a bik takin Caicedo a khel ṭha ṭhin hle.

Enzo chuan, "Khawl ang mai a ni e," tiin a ṭhianpa hi a fak a, "A khelh ṭhat chhunzawm zel ka beisei," a ti bawk. Chelsea boss Maresca pawhin, "Ka tan chuan Manchester City midfielder Rodri leh Caicedo te hi khawvela defensive midfielder ṭha ber an ni," a ti.

Chelsea keeper Robert Sanchez pawhin a ṭhianpa hi fakin, "Ramsa ang mai a ni a, a position-ah chuan a aia ṭha an awm lo. Khawvela ṭha ber pawl a ni a, a position-ah amah aia ṭha sawi tur tu nge awm? 50-50 chance awmah chuan ball changtu zawk a ni zel," a ti a, a fak duhthawh hle.

Chelsea player leh coach ten heti taka an ṭhianpa an fak hi Tottenham Hotspur laka 1-0 a an chak hlim kha a ni a, season khelh hmabak a la tam avangin khawvela a position-a ṭha ber a nih leh nih loh chu season tawpah a hriat ang.