A sang pali zingah Xhaka telna Sunderland

Sunderland hian thawnthu ngaihnawm tak an nei, kum riat liam ta mai kha chuan Premier League aṭangin an tla - tunah erawh an chanchin a danglam ta, English football inelna sang season kal laiah hian point hmu tam zual pali zingah an tel mek.

Thawhṭanni zan Premier League inkhelah, mikhual Everton lamin Iliman Ndiaye hmangin goal khung hmasa mah se, second half tirah Granit Xhaka chuan sutin goal dang a lut zui tawh lo, 1-1 a inkhel tawpin point khat ve ve in an insem.

Stadium of Light-ah goal mawi kan hmu, hla deuh tak aṭangin Ndiaye chuan ball a lalut a, player pali vel ngawtin an bawr. Mahse, amah vengtute a paltlang zel a, a dah dana a insiamrem hnuah goalkeeper Robin Roefs dan phak lohin a khung.

Jack Grealish-a'n khung belh theihna remchang hmu mah se goal ban a pet per a, English forward hian Thierno Barry tan ball ṭha bik siamsak mah se ani pawh hian hnai tak aṭangin goal kham chungah a pet chhuak bawk.

Everton lam goal nawr na tak karah Sunderland an dingnghet tlat a, hun pawimawh laiah Xhaka a inlar. Arsenal midfielder hlui hian box pawn aṭangin kawh zetin a pet a, ball kal hi an lo danpial avangin Jordan Pickford tan dan hman a ni lo, an inhnehtawk zui ta a ni.

Black Cats manager Régis Le Bris chuan, "Inkhel bul kan ṭan fuh tawk lo a, goal khat chauh kan chhuah kha kan vannei hle. A nihna takah chuan keini aiin an khel ṭha zawk a, inkhel kha an thunun hle a ni. A pawimawh lai erawh chu kan tlawm duh lo kha a ni," a ti.

Kar tawp Premier League inkhelah Sunderland hian hmahruaitu Arsenal an hmachhawn dawn, anmahni khelmuala khel tur an nih bakah Gunners hian kar laihawlah Champions League an khel hah dawn, point hmuh an tum ngam ang.

Everton manager David Moyes chuan, "Tun hnaiah kan khel ṭha ṭhin, mahse a tawp erawh kan khar ṭha lo deuh ṭhin. Manchester City leh Tottenham lakah pawh a tir lamah chuan kan khel ṭha viau, mahse hmasawn ngaihna lai kan nei.

"Tlarhma lam kan hriam zual a ngai, kan ṭhat tawk lohna lai hi a rang thei ang berin siamṭhat kan tum ang," a ti. Everton hian match 10 aṭanga point 12 hmuin 14-na an ni mek a, tla thei china awm West Ham aia an san zawkna chu point nga chauh a nih avangin hmasawn an ngai hle.