Nikum nen teh rawh u - Thomas Frank

Tottenham Hotspur manager Thomas Frank chuan tun hnaia an khelh dan sawiseltute chu, season hmasaa an dinhmun nen khaikhin mai turin a hrilh - hna thawk ṭha a inti tawk.

Frank chuan, "Kan thawkrim em em a, hmasawn tumin theihtawp kan chhuah reng a, hmasawnna pawh kan nei ngeiin ka hmu. Tun hnaiah kan result a ṭha tawk lo tih chu ka pawm a, chuvang chuan en rawn pawh kan hlawh hle.

"Mahse, tun season-a kan inkhel, result ṭha tak tak kan neihnate pawh kha thlirlet ve tho rawh u. Season hmasaah khan he club hian hun duhawm tak a tawn rualin, hun thim tak pawh a tawng tel tho.

"Season hmasaah khan league match 22-ah ngawt tlawmin, 17-na ni chungin season kan khar. Kha ta ṭang khan teh ula, tun season-ah match 10 kan khelh hnuah point 17 neiin, Champions League-ah kan la tlawm lo a ni - season hmasa kan buai lai khan he thil hi min pe dawn se, lawm takin kan pawm vek ang chu!

"Kan duhthusam angin thil a kal vek lo tih ka hria a, mahse, hma erawh kan sawn a ni," a ti. Spurs boss chuan an league match hnuhnung bera fan-te au elna chu chhangin, "Football-in a ken tel a ni a, pressure zo dawn lo ila, football khawvelah kan awm nang!

"Fan-ten kan khelh dan an duhkhawp loh avanga min au el a nih chuan ka hrethiam a, mahse, min au phur ta se, kan chhawr zawk ang," a ti - an league match hnuhnung berah khan an mikhual Chelsea chu 1-0 in an ngam lo.

Spurs hian UCL-ah zanin dar 1:30 hian match an nei dawn a, Danish club Copenhagen an mikhual ang - match thum an khelh tawhah vawi khat an chak tawh a, Villarreal (1-0) laka an chak hnuin, Bodø/Glimt (2-2) leh AS Monaco (0-0) an inhnehtawkpui.

Hetihlai hian Lucas Bergvall, Djed Spence leh Mohammed Kudus te chu hliam avangin zaninah an inlan theih a rinawm lo. London club hian November 8, Inrinni zanah Manchester United chu league match-ah an mikhual zui dawn.