Saints-in an coach Still an ban

Championship club Southampton chuan an manager Will Still chu thla nga hnu lawkah a hna aṭangin an chawlhtir a, Saints Under-21 head coach Tonda Eckert chuan a enkawl lailawk ang.

Kum 33 mi Still hi May thla khan Saints hian kum thum chhung atan contract an ziahpui a, a competitive match hmasa ber erawh August-ah hmachhawn ve chauhin, Wrexham chu 2-1 in an hneh nghal.

Mahse, Still hian beisei ang result a pe zui lo. Saints hi inelna hrang hrangah match 16 kaihruaiin, vawi li chiah hnehna a chanpui thei a, vawi ruk draw neiin, vawi ruk an tlawm.

Premier League mawngphah luah chunga relegate Saints hi season tharah pawh English top flight league-ah an kir loh hmel hle. Inrinni zan khan Preston North End chu 2-0 in an ngam lo a, team 24 inelnaah 21-na an ni mek!

Belgian coach Still hi la nau viau mah se, coaching lamah tawnhriat a nei ṭha hle. An ram club Lierse leh Beerschot enkawl tawhin, Ligue 1 club Reims leh Lens a lo enkawl tawh bawk.