Newcastle-in Bilbao mikhual dawn

Premier League club Newcastle United chu zanin dar 1:30 hian Champions League match khel turin an inlan dawn a, Athletic Bilbao an mikhual dawn.

Magpies hian tun season-ah beisei an phak lo hle - league match 10 an khelh tawhah vawi thum chiah hnehna an la chang! Vawi thum draw nei tawhin, vawi li an tlawm tawh thung.

Newcastle hian an match hnuhnung berah, tun season-a che chhe tak West Ham chu 3-1 in an ngam lo a, club legend Alan Shearer chuan, "Rei tak hnuah Eddie Howe-a hnuaia an khelh chhiat ber a ni hial ang," a ti a, player-te na takin a khak bawk.

Hammers laka an tlawmna inkhelah hian coach Howe chuan chawlhlawkah player pathum ngawt a la chhuak a, a hnuah substitution dang pahnih a siam leh bawk - hetihlai hian 2-1 in an hnufual a, inkhel a tawp meuh chuan 3-1 in an tlawm.

Howe chuan, "A nihna dik takah chuan, substitution ka siam lai khan tu pawh la chhuak thei dinhmunah khan ka ding a ni ber a, khatiang ang rilru puthmang kha ka la pu ngai lo.

"Newcastle ka enkawl hnuah player zawng zawng thlak vek duh maina thinlung ang kha ka la pu ngai lo," a ti thlawt a, zaninah erawh a team-ten hnehna an chanpui ngei a beisei ang.

Magpies hian UCL lamah chuan an tichhe lutuk lo. An match hmasa berah Barcelona (2-1) ngam lo mah se, Union Saint-Gilloise (4-0) leh Benfica (3-0) lakah hnehna an chang zui a, zaninah pawh St. James' Park-ah an inkhelh dawn bawk avangin chak tura beisei an ni.

Barca boss hlui Ernesto Valverde enkawl Bilbao hi an ropui lutuk bik lo. Tun season-a league match vawi 11 an khelh tawhah vawi nga ngawt tlawmin, vawi li chiah an la chak a, vawi hnih draw an nei.

La Liga-a an match hnuhnung pahnihah an tlawm a, UCL-ah pawh match thum an khelh tawh aṭangin vawi khat chiah an la chak - vawi hnih chu a tlawm zawkah an ṭang tawh.