Barca-in Rashford chelh an duh

Spanish champion Barcelona chuan forward Marcus Rashford chelh an duh a, hetihrual hian Manchester United aṭanga loan-a an hawh forward hian a hlawh tihhniam pawi a tih loh a ngai dawn niin Spanish media-te chuan an tarlang.

Kum 28 mi Rashford hian Barca hi season khat chhung loan-a khel turin a zawm a, Catalan club leh Manchester United inrem danah chuan, Barca hian an duh chuan season tawpah, pound maktaduai 30.3-in a nghetin an la lut thei dawn.

Barcelona chuan Rashford-a man zat hi pek an inhuam zan nia sawi a ni a, mahse, English forward hian kar khatah £300,000 a hlawh mek - Barca hian heti zat hlawh pek hi an inhuam lo.

Rashford hian contract thar a ziak dawn a nih chuan, Barca hian kum rei zawk atan ziahpui an duh bawk - hei hi an hnena rei tak cham tura an duhna ai mah chuan, financial rules lamah thiam an chan theih nana, a hlawh chu ṭhen sawm an duh vang a ni ber!

Barcelona hi sum lamah nasa takin an talbuai a, an dinhmun hi an la siamrem lo. Hetiang a nih avang hian UEFA lamin an la thlithlai reng a, an sum hman danah fimkhur a ngai hle.

Rashford hi Barcelona-a a kal hnuah insiamṭhain, European football-a player hmuhnawm ber pawl a ni leh tawh - tun season inelna hrang hrangah match 14 khelin goal ruk a khung tawh a, assist vawi sarih a nei tawh bawk.

Barcelona hian zanin dar 1:30-ah Champions League match khel turin Club Brugge an lenchillh dawn a, match thum an khelh tawhah vawi khat an tlawm tawh.

Catalan club hian Newcastle United (2-1) leh Olympiakos (6-1) hneh tawhin, champion lai Paris Saint-Germain (2-1) lakah an tlawm tawh thung - zaninah Belgian club hneh theih an inbeisei ang.