Mizorama naupang nei ṭha ber SYS FC

Mizoram Football Association hnuaia kum bithliah inelna ngaihhlut Zawlbuk Zodin Memorial MFA Under 17 League-ah SYS FC chuan a zawna vawi thum champion tum Aizawl FC 3-1 a hnehin an champion. MFA Under 17 hi tun hma chuan MPL U17/U18 tih ṭhin a ni a, nikum aṭang khan MPL club bakah club dang tel phalin a hming pawh MFA Under 17 tihin an thlak.

SYS FC-in final an thlen hmasak berah nomawi an chawi. Nimin inkhelah hian coach Lalthawmmawia (Mamawia) enkawl team tan Benjamin Lallawmawma goal hnih a khung bakah H. Lalhriatrenga te hmangin an khung. SYS tan chanchin lawmawm a ni a, Mizorama football zirna hmuna naupang nei ṭha bera chhal ngam a ni. Champion puitu Bena'n goal 16 a khung a, top scorer a nih bakah best player-a thlan a ni bawk.

SYS hun

Aizawl FC captain Francis-a'n inkhelh ṭantirhah crossbar a pet per nghal a, champion lai hian chance ṭha dang pawh an nei. Mahse, first half thununtu chu SYS an ni a, Omega Lalawmpuia Ralte-in penalty hlawh chhuakin cool takin minute rukna lekah Tlangnuam rawlthar Bena'n a khung.

SYS tan midfielder ball thiam Hriata'n ṭha taka a lakluh hnuah a ball pek fing chu striker Bena'n keeper chauh a hmachhawn chungin goal ruakah a khung lo. Mahse, Bena hian a tihsual siam ṭhain a pass ṭha bik chu Thingsulthliah rawlthar Hriata'n minute 18-naah a khung. SYS hi goal tam zawk khung thei ni mah se goal hmaah an duh tui hret a, an khung belh lo.

AFC lamin beiseina an neih phah a, Lalhruaipuia'n keeper tan hna siamin first half tawp hma chiahin captain Francis-a'n box pawn aṭangin ṭha zetin a pet goal a, halftime-ah 2-1 a ni.

A changtupa Bena

Aizawl FC-in beiseina neiin second half an khel bawk a, SYS an bet ta zawk. Champion lai AFC hian an nawr ta thung a, SYS an hlauthawng. Coach K. Lalrinsanga hoten chance ṭha bik an nei a, Lalhruaimawia'n keeper chiah a hmachhawn hnuah a pet over luah.

Mahse, SYS tan a hunah tak Bena rawn inlar a, minute 79-naah dinglam aṭanga Omega cross ṭha chu Tlangnuam rawlthar hian goal-ah a chantir. Coach Mamawia hoten thawkna hun an nei a, Aizawl FC-in nawr chhunzawm mah se an ṭangtluan. SYS 3-1 a chakin an champion.