PSG ngamtu Diaz

Bayern Munich-in Thawhlehni zan khan European champion PSG chu 2-1 in an hneh a, goal hnih Luis Diaz khung niin Liverpool forward hlui hi goal hnih a khung hnuah hnawhchhuah a ni. Luis Enrique hoten player 10-a khel Bayern lamah Joao Neves hmangin siphurh sut ṭhen mah se goal dang an khung belh thei ta lo.

Parc des Princes-ah Bavarians-in inkhel bul an ṭan ṭha a, minute lina lekah Michael Olise goal khung tur chu PSG keeper Lucas Chevalier-a'n dang mah se a per chu Luis Diaz-a'n a khung. Aleksandar Pavlovic pawhin a goal a khung teuh a, box pawn aṭanga a ball pet chuan goal pan a per.

PSG-in siphurh sut ṭhenah an inngai a, siphurh suttu Ousmane Dembele a offside a, a pawm a ni lo. Bayern an khel ṭha zel a, Serge Gnabry-a'n goal ban a per hnuah Luis Diaz-a'n PSG captain Marquinhos ball chhuhsakin goal-ah a chantir a, minute 32-naah 2-0 a ni.

First half tawp hmaa Josip Stanisic goal khung pawm a ni lo a, injury time-ah Diaz-a'n Achraf Hakimi tlawhin thil thlen dan VAR hmanga ennawn hnuah goal hnih khungtu Diaz hi hnawhchhuah a ni. Halftime-ah 2-0 ni mah se Bayern an kim tak loh avangin PSG-in beiseina thar an neih phah.

Enrique hoten second half-ah an nawr na a, Manuel Neuer-a'n hna a ngah. German keeper hian Khvicha Kvaratskhelia leh Vitinha te goal khung tur dang thei mah se minute 74-naah Joao Neves-a'n ball pet erawh a dang thei ta lo. Vincent Kompany hote an hlau thawng a, PSG-in nawr na mah se Bayern an ṭang tluang hram.

Bavarians hi match li khelh tawhah la chak vekin hmahruaitu an ni a, Bundesliga-ah pawh match kua khelh tawhah an la chak vek. Kompany hnuaiah Bayern-in hma an sawn hle.